世事政情

　　【晴報專訊】由吳君如、MIRROR成員呂爵安（Edan）、鄭中基及梁詠琪主演的賀歲片《闔家辣》將於大年初一上映，一眾演員原定昨日出席商場宣傳活動，但因應疫情而取消；不過君如及Edan昨日開live見粉絲，更落區為街上的電影海報簽名留念，希望集氣讓電影能如期上映。

君如與Edan落區努力宣傳《闔家辣》。

　　雖然《闔家辣》商場活動無奈取消，但吳君如及呂爵安昨日特地開IG直播與網民互動。戲中飾演兩姑姪的君如及Edan提早跟大家拜年，又呼籲所有港人集氣，希望電影能順利在大年初一上映。他們大談為電影錄製主題曲，Edan笑言唱得輕鬆，但君如坦言唱到「就快斷氣」，她搞笑說：「我係退咗休嘅歌手！」她自爆曾奪1993年叱咤樂壇生力軍女歌手銀獎，同屬新人銀獎得主的二人，立即握手互相祝賀。兩人即興哼唱《闔家辣》主題曲，笑言來年可望衝擊「十大歌曲」及「我最喜愛的歌曲」獎。

幸運爵屎成功集郵

 君如與Edan即場撕下海報送給粉絲。

　　提到全港九街道貼出《闔家辣》主要演員的造型海報，但Edan的大頭海報卻經常消失，原來有「爵屎（Edan粉絲）」紛紛撕下海報留念。Edan笑說︰「君如話好嬲，佢唔係嬲要再貼過，係嬲點解唔搣佢嗰張！」君如即說：「你哋搣走Edan海報係無戲飛送，如果搣我嗰張拎嚟就可以換戲飛，搣一張送一張，但唔好搣爛！」

二人在街頭為海報簽名，呼籲粉絲打卡。

　　兩人本來在車中開live，當找到張貼電影海報的地方，即落車快閃補貼Edan海報及親筆簽名，君如更教大家如何完美地撕走海報。雖然他們未有透露身在何地，但已有網民認出是柴灣工業區，更有粉絲趕到現場。有爵屎獲爸爸開車趕及到場，君如及Edan即幫忙撕走牆上海報送給她，並合照留念。此外，由於有確診者上月27日下午曾到訪九展，當時MIRROR及ERROR身在九展ViuTV，所以他們日前接受首次強檢，全屬陰性。有粉絲在直播留言詢問Edan第二次檢測結果，但他未有睇留言而無回應。

　　MIRROR隊長Lokman（楊樂文）宣布與女友分手，成為MIRROR中「尾二」一位「失守」隊員，唔少人都覺得非常震驚。MIRROR隊中僅剩Stanley（邱士縉）一位仍然同《全民造星》已經拍拖嘅女友一齊。

　　Lokman剛剛突然於Instagram限時動態宣布分手消息，Lokman言辭間表示當中似乎已經一段時間「掙扎」：「我們已經分開了一段時間，相隔了一段時間才公布，是因為我們也想確認一下事情，確認一下對方，在一個我們都舒適的情況下向大家交代。」

　　Lokman表示同前女友關係依然良好：「分開是和平的，關係是舒適的，我們也已經踏上成長的路上，更加了解自己和對方。十分感恩一起走過的日子，我們之間只有滿滿的祝福和感謝，希望大家給予我們空間去成長。過後也不會在公開場合對這段關係作出任何回應或討論，希望大家明白與體諒！我們感謝對方！感謝各位！」Lokman前女友甄吳露茜（Luxi）同時都發同樣聲明。

　　Lokman同Luxi拍拖七年，上年曾喺社交平台上載花束照及留言「「今次掂晒啦老豆（竇）！」，即時引起求婚成功嘅揣測。不過Luxi之後出席活動時就否認有關傳聞，稱Lokman只係「520」送花， Luxi當時表示結婚冇壓力：「結婚不嬲都係靠衝動，所以唔會plan幾年之後結婚，同埋大家都仲後生。」然而，Luxi日前去到台灣澎湖散心，早露分手端倪：「聽說看海會讓人心情變好。謝謝澎湖治癒了我，然後我就曬傷了。」然而，二人拍拖期間一同飼養三貓一狗，暫時未知去向，恐怕都會成為「單親家庭」。

　　MIRROR 12子唔少入行前都有已經有穩定女友，不過都喺入行後相繼分手，現時只剩Stanley一個仍然係同「元祖」女友一齊。Stanley與女友Alina拍拖七年感情穩定，熱愛潛水嘅Stanley日前透露，諗過將來舉行水底婚禮，奈何女友不愛潛水，所以打消念頭。而Alina早前都喺電台訪問分享與Stanley相識經過：「我哋係大學讀書時一齊喺主題公園工作認識，識咗十幾年，有次拍廣告撞番，見番一年先一齊。」Alina表示Stanley人氣急升，拍拖都冇壓力：「佢近排忙啲，溝通時間少咗，但感情又再昇華咗，學識點溝通先可以維持到一段好嘅關係。」希望呢一對可以打破MIRROR分手魔咒。

盤點MIRROR分手魔咒

Frankie

　　MIRROR顏值擔當Frankie出道前是一名專業舞蹈員，與前女友Hei拍拖13年，可惜上年兩人就在IG限時動態出文宣佈分手，Frankie近日更被指原來一早偷食現任女友Christy，令一眾粉絲感到心痛。

Edan

　　Edan（呂爵安）於2018年參加《全民造星》時，與Stephanie仍屬情侶關係，後來女方出帖文，表示拍拖三年的二人和平分手，會支持Edan繼續去追夢：「細個以為咩唔夾呀timing呀全部都係移情別戀嘅藉口，但理智與感情角力左（咗）好一段時間，我都agger（贊成）朋友會係我哋目前最適合嘅關係。」不過之後Stephanie曾暗示因為男方偷食導致分手。

Jer

　　Jer（柳應廷）前年被指與拍拖5年女友Kelly鬧分手，皆因網民發現Kelly於IG取消追蹤了阿Jer，而阿Jer亦承認自己正與Kelly冷戰中，現在阿Jer的IG也沒有再追蹤Kelly，事後二人宣布分手，而回復自由身嘅Jer早前於MIRROR喺英國開騷時都有於IG結識下異性。

Ian

　　Ian（陳卓賢）入行不久就在ViuTV 劇集《無限斜棟有限公司》中，與模特兒盧慧敏（Amy）撻著愛火，兩人愛得低調，甚少放閃，不過Amy曾在IG發文指「也願每一個人可以找到一個一起瘋狂，笑著世界瘋狂的人」，Ian則更回覆：「I think I’ve found one」。不過前年二人和平分手，結束兩年情。