世事政情

　　【晴報專訊】薛家燕升呢做嫲嫲，首名內孫於上周三（26日）出世，家燕姐昨日陪兒子石耀庭在醫院會見傳媒，家燕姐提起孫仔即眉飛色舞，完全被孫仔溶化，又大爆孫仔跟她一樣有迷人酒凹。

薛家燕抱住孫仔開心到四萬咁口。（FB圖片）

　　現年71歲的薛家燕終於如願抱孫，新抱陳素怡（Zoe）一索得男，誕下重七磅半的男B，英文名Julian。家燕姐昨日形容孫仔是一名「大隻仔」︰「新抱今次係剖腹生BB，之前一晚我又興奮又緊張，完全瞓唔着，依家平安出世，我成個人安樂晒。孫仔好大隻，個樣似爸爸，酒凹就似我，同埋佢喊聲好大，嘈醒其他BB。」新任爸爸石耀庭則透露囝囝英文名較斯文，希望囝囝將來會乖巧一點。

薛家燕與兒子石耀庭會見傳媒，分享榮升嫲嫲及爸爸的感受。

讚B仔一抱就唔喊

石耀庭與太太陳素怡及囝囝Julian組成三口之家。（FB圖片）

　　家燕姐表示孫仔十分健康，食得瞓得，又指孫仔喊時一抱起他便不會哭。家燕姐笑謂︰「個孫好似認得我咁，醫生話佢扭抱，佢哋叫我唔使抱咁耐，但我點捨得放手呢！佢哋話驚我攰，我話咪畀我抱下囉！」囝囝石耀庭踢爆家燕姐唱《皆大歡喜》給孫仔聽，家燕姐哈哈笑說︰「我唱『唏呀唏呀唏』，佢就擘大眼望住我，佢好識氹我開心。」問家燕可有幫手餵奶？她笑說︰「新抱餵母乳，所以我餵唔到，但有請24小時陪月幫手。」

新城電台眾DJ及高層送果籃祝賀薛家燕。（FB圖片）

　　另外，家燕姐預告整個六月會停工幫手湊孫，又準備薑醋派給親朋好友︰「我計過要準備200幾至300份，係自己品牌推出嘅薑醋，所以嚟緊真係有啲忙。」她又感謝新城電台同事及高層送給孫仔的禮物及果籃。

　　母親節即將來臨，身為人母的薛家燕8日到美孚出席「家燕媽媽肺事話你知」活動，與長者們一起歡度下午。現場家燕媽媽大受長者歡迎。期間演出短劇，透過故事以輕鬆手法分享健康資訊，她說：「你哋細細個就睇我做戲，我細細個就做戲㗎啦，多謝大家嘅支持，我哋最緊要身體健健，咁就皆大歡喜啦！」

　　家燕媽媽隨即獻唱經典作品《皆大歡喜》兼大跳十字步：「呢個係好健康嘅運動嚟㗎，大家都要跳多啲。」為現場帶來愉快氣氛。協會亦邀請長者們參與活動，當中更有近百歲長者，家燕媽媽向他們獻花，提早分享母親節的溫馨暖意。她直言自己早已是長者行列，自己亦希望健康點繼續有活力，為大家帶來歡樂。

　　家燕媽媽於活動後受訪，她坦言平日很少到茶樓獻唱：「今日係好特別嘅，因為我知道有啲老人家已經九十幾歲，真係睇住我長大，見到佢哋特別有親切感，所以今日真係好值得嚟，同大家分享啲健康資訊。」她指許多疾病亦會影響肺部，很需要大家的關注：「長者最緊要身體健康，我哋健康，屋企人都安心快樂。我真係好忙㗎，仔女又大晒，工作又接唔停，有時個女都要幫我推咗啲工作，不過我自己有個使命，覺得要同大家分享快樂，所以最緊身體健康。」

　　家燕姐笑謂現時不敢隨便祝福長者長命百歲：「頭先有個已經99歲啦，聽講香港人壽命好長，因為我哋活躍又勤奮，如果唔係個人鬆弛咗，個腦都冇咁靈活，所以我都唔會退休㗎。唱歌要練丹田氣，跳舞又係好好嘅郁動，兩樣對身體都好，尤其跳十字步好柔和嘅，又唔會太劇烈。」

　　她表示現在因為工作關係，經常到不同地方拍攝及演出，忙碌得來很享受：「好多美食，又可以睇到唔同地方。我自己都有個心願，除咗家燕媽媽藝術中心同自己品牌嘅曲奇、湯水，我希望遲啲自己設計啲長者服裝。好多人話我成日着到彩色咁，人真係要着得彩色啲先開心，尤其長者，我希望我嘅衫可以令佢哋着得青春可人、有活力。」

　　至於星期日的母親節，家燕姐將與四位視帝到新加坡：「我會同羅嘉良、黎耀祥、馬德鐘、陳展鵬去新加坡表演，佢哋個個都帶埋老婆去，咁我就帶埋仔女、新抱同個孫去，順便周圍玩吓。我個孫好有表演慾，所以我都同佢練咗首歌，到時喺台上唱畀大家聽。」