職場

 

 

　　高級知識份子過招：

 

　　「老婆，你可唔可以溫柔D，好似小三咁呢？」

 

　　「你喺呢方面好有經驗咩？」

 

　　「唔係。我教文學嘅，想像力豐富啫。」

 

　　「你英文咁得，小三點譯吖？」

 

　　「喺感情層面，叫lover（愛人），物質層面叫gold-digger（掘金者）、傳統叫concubine（妾侍）、現代叫girlfriend（女友）、大婆叫佢whore（婊子）或者bitch（狗乸），唔！斯文D，譯mistress（情婦）啦。」

 

　　「老公，你嘅論述好有廣度，不過我嘅拆解夠深度。mistress拆開嚟解，即係初時係miss，玉女卜卜脆，跟住就stress（壓力），茶煲日日煩。或者直接譯為麻煩小姐。」

 

　　「文字可以一字多義喎，miss又可作錯過、避過解，咁就即係減壓解語小花啦。」

 

　　「老公，你今晚想瞓㕑房定浴缸？」

 

　　「嘻嘻！哲學性討論啫，何必濫用私刑呢？」

 

　　　　***  ***   ***

 

　　結婚前，準女婿會向未來外父外母保證：

 

　　「我會令你個女一生幸福。」

 

　　你幾時見過未來新抱向家翁家姑承諾：

 

　　「我會令你個仔一生快樂。」

 

　　點解？

 

　　因為女人冇男人咁興開空頭支票囉！

 

　　　　***  ***   ***

 

　　如果老婆想老公注意，佢就突然心情唔靚，博同情。

 

　　如果老公想老婆注意，佢就突然心情大靚，博懷疑。（當然，後果自負。）

 

　　　　***  ***   ***

 

　　你記唔記得，你決定結婚時興奮到爆炸、嗰種放棄單身，擁抱世界嘅感覺？

 

　　後來先覺悟出：其實當時衹係放棄理智、擁抱瘋狂！

 

　　正係有時婚姻得啖笑，偏偏多人要！