職場

　　明年的春節假期在年初四結束，年初五上班。但初五是破日，初六更驚嚇，是四絕日，所以諸事不宜。至於初七，雖是成日，但辛酉一柱是金，明年的用神為水木，金旺則剋木（如斧劈樹），所以也不理想。

　　丁酉年立春八字：

　　年柱：丁火 酉金

　　月柱：壬水 寅木

　　日柱：壬水 戌土

　　時柱：庚金 子水

　　日主壬水雖有子水及另一壬水幫拖，但因月支為寅木而洩氣，所以稍弱，但又不是太弱，因有庚金、子水等幫身。調侯方法：用木水，以水灌木，使木吐秀，如此則金生水、水生水、木生火，相生有情，全局靚仔晒！

　　講人話，打個比喻：日主壬仔識賺錢嘅，不過有個大使嘅女朋友，壬仔成日要同佢找卡數，找到氣咳！如果有個水哥射住條水喉，佢就繼續可以冧女友，大家關係咪真係水乳交溶囉。

　　根據這水木用神的原則，以下為開工日的考量：

　　首選：2月6日初十（星期一），甲子開日。一柱水生木，最佳。吓！咁遲？ 唔想撈咩？其實只係請三個工作天嘅假，時辰選辰時（你可以早上8:45返工），或者未時（下午3:30至5時），亥時最好，不過係晚上9:30至11時，要自僱人士先得。

　　次選：2月4日初八（星期六），壬戌成日。用甲辰時，又係早上8:45碌返工。

　　三選：1月28日初一（星期六），乙卯滿日。雖然卯酉沖，但係好多公司同零售店等唔到初八初十，所以唯有揀年初一。可用壬午時及癸未時（11:30am-3pm）。

　　我想初八初十對好多人而言，可能太遲咧，折衷辦法係年初一。老闆叫人年初一返工？可能暴動喎！又有蹺，就係搵一名員工捱義氣，叫佢午飯前或後返一返公司，開晒所有人嘅電腦，並以新嘅黃色毛巾（濕水）抹各人寫字枱，然後用自己電腦發「開工大吉」電郵畀所有同事及主要客戶。老闆最多醒番佢半日假期啦。

　　至於猴年年尾吉日，可參考：

　　還神及大掃除：1月7日星期六（舊曆十二月初十）

　　團年：1月19日星期四（舊曆十二月廿二）

　　可選午餐時段（11:30am-3pm），因午未時皆吉；或晚餐時段的酉時戌時（5:30pm-9pm）。

　　1月27日星期五（舊曆十二月三十日）相對冇咁好，又兼歲破，不過大部分人都會揀年三十晚，柴娃娃，趁熱鬧，應吓景。

　　在此祝大家好頭好尾、幸福可祈！

　　上期談及雞兔鼠馬在雞年會被波及，化解的方法如下:

　　(一)在雞年有沖尅刑害的生肖，在該年多有變動，所以如果本來已計劃搬寫字樓、遷居……等久而未決，可在雞年付諸實行。又頻繁出門，或在港左騰右騰開會視察、構建人脈等，都可以應了勞累頻撲之數。還有另一有趣應法:一位俊男因太重感情，讓其不愉快婚姻拖了六年，本月向我透露今年要離婚了，長痛不如短痛，他好快便可以復活成筍盤，應得好!

　　(二)可戴豬的飾物，當然，攬住隻生豬(肖豬者)更好，如果冇豬朋豬親，可以配戴豬的飾物，豬為亥水，雞為酉金，酉金生亥水便沖了金的銳氣，減低雞年的傷害。

　　(三)做善事、主動破財(見上期破歡喜財的提示)。

　　雞兔鼠馬會被「移動」，被啟動的生肖則有牛虎龍蛇。

　　老虎舊年真係虎落平陽，不祇身體出問題，事業、家庭、朋輩間亦多麻煩，就算唔關佢事，佢都一樣領嘢。老虎霉咗咁耐，今年可以曬吓太陽，睇吓風景咧。雖有死符(白事)、小秏(破財)、劫煞(扒手小偷光顧)等凶星，但喜有吉星「月德」扶持，又掌「國印」，即有勁秋猛人射住，一於冇有怕。財運亨通，記得賺到錢就去捐吓啦，應咗「小秏」，小財出咗，大災不來。

　　牛、蛇、龍亦行運。

　　牛仔在三台、天解、黃蓋、唐符等吉星幫助之下，有達官貴人助力，縱有麻煩亦迎刃而解，全年大致順利，惟要提防破財、官非，亦可能有親人離世。

　　條蛇今年有天廚星而得食，唔駛俾人做美食，一於歎番夠本。不過今年要小心自己前後左右，一來易被人背後插幾嘢，亦有可能被人明搶金錢，或暗搶功勞。除此之外，今年是可喜的一年，會有一翻新氣象。

　　條龍今年遇上紫微龍德，真個助力非凡、龍顏大悅。惟有暴敗、天厄、天煞等惡勢力，因此切勿驕矜，以防被天災或突發事件等殺個措手不及，但祇要耐心細心，肯定有景。今年總體會心曠神怡，必有所得。

　　羊仔今年普普通通，有時有D孤獨感，可能有親人拜拜。

　　馬騮仔舊年已有衝擊，今年仍要低調，提防染病、受騙，避免去白事場所。

　　豬仔有地解、天乙吉星，自有貴人解困，旅行公幹亦順遂。惟略感孤單。

　　狗仔有太陽之光照住，冇大礙，惟要留意交通事故、及被人誣陷或唱通街。

　　無論你是甚麼生肖，看到有吉星，就先擁抱喜氣、預支歡樂；看到有凶星，就警惕自己凡事小心，輸少當贏，又要注意行善助人，增加自己福氣的籌碼，墊厚個氣墊Cushion，就算有大山擋前，自然見山過山、見關過關。