職場

　　香港經濟有幾好，市道有幾暢旺，大家有目共睹。如果大家感受不到「由亂入治」，步入「由治及興」的這個新階段，只能是因為你悲觀。

　　大公司大企業一樣醒目，配合香港發展新趨勢以平取勝，直接撤走close down得，cut人down size亦得，配合政府輸入外勞政策cut cost更加得。尤其是重災區的飲食業建築業運輸業物流業，由高才通到勞工階層全部涵蓋，香港唔慌冇人才、冇人手，大家話係唔係？

　　天要落雨公司裁員，打工仔冇得揀只能接受，執包袱走人。但原來事情並不是如此簡單，最近就有一間據說Big 4以外最大的會計師樓要裁員，字眼上講得好好聽係勸退（counsel out），有兩個看似是選擇的選擇可供選擇：自動辭職，沒有代通知金，有reference letter；不自動辭職的，有代通知金，沒有reference letter。

　　同一時間亦收到幾位讀者message問我，因為辦公室政治、因為架構重組、因為生意不景……原因不同但結局一樣，you’re fired！但同樣地都被要求選擇being terminated 或是自己resign。選擇自己辭職的reference letter會寫明是自行辭職，但就要放棄代通知金。想要賠償的，同樣會得到reference letter，不過就會寫明係被炒的！

　　公司炒人，員工冇say，一係畀notice一係畀賠償金，就係咁簡單，何解搞到愈來愈複雜？有打算裁員、或是有很多年資長的員工的公司，肯定會趕在明年5月1號取消「強積金對沖安排」生效前出招，打工仔境況堪虞。

　　Reference letter真的有那麼重要嗎？退一步講，沒有reference letter就找不到新工？如果是被炒的，真的會影響日後找工作的機會嗎？

　　關鍵不在於letter，在於心態、在於如何向新僱主交代。最有力的reference letter並不是由公司寫的那一張，因為當中只能列明在職期、職級、離職時的人工及理由。由直系上司寫的reference最有效更具說服力。如果被炒是因為被迫二選一的話，講出事實就可以。被炒的原因離不開不識做人、不懂做事、做錯事，坦白承認自己的缺點錯處，已經深刻反省、吸取教訓，絕對比講大話東拉西扯顧左右而言他好吧？

　　世界很細小，reference letter有寫冇寫又點？紙是包不住火的，內裏當真有文章的話，如何隱瞞逃避，始終都會爆出來的，倒不如一早自行交代清楚。要錢定要信？計我話，最緊要自信！

　　以前很多人一份工打一世，或者一世人最多轉幾次工。對於辭職該怎樣辭，好來好去是宗旨，如何辭得得體最為重要！即使決定離開也不會想破壞大家的關係，始終世界很細，難保有朝一日，山水相逢。但這種辭職是為了更好前途的辭職，買少見少，用罕見來形容都不為過。現今的辭職，只得兩個原因︰一就是覺得人工低屈就，二就是做得唔開心委屈，擺明是條氣唔順的辭職，就會造成很多僵持矛盾局面。

　　我想提醒各位打工仔，不要在自己盛怒時衝動辭職，我不是干涉大家辭職，只是需要部署安排。先看清楚自己的僱傭合約內容，寫明究竟辭職要點樣辭、需幾耐通知。不要因為火遮眼抱「最多補錢就走」的心態，其實不是所有離職通知都能夠用通知金代替的，有些僱傭合約寫到明一定要做完通知期。

　　另一個大家很容易忽略的，就是大假的計算扣減，搵到新工當然希望可以盡快返工，例如應該做到30號，因為有10日大假，所以做到20號就走得。計數是這樣計，但是否可以用來扣減、提早離職？不是自己以為可以就可以，要根據僱傭合約的條款，有些合約會列明大假不能作扣減通知期之用。即使可用作扣減通知期、提早離職，大假期間雖不用上班，身份依然是員工，所以放完大假才能夠返新工。

　　有打工仔被炒魷魚，公司不是賠錢，而是給予一個月通知期。被炒魷魚當然非常氣憤，莫講做多一個月，留多一日都唔想，即時拍枱即刻走，結果反被扣一個月人工。有冇搞錯？答案係冇搞錯！因為想早走必須得到公司同意，如果未得公司許可擅自提早離職，等同自己辭職；根據僱傭合約，同樣需要一個月通知期或通知金。

　　一係被炒，一係自己遞辭職信，你會如何選擇？受影響的是日後有僱主做reference check，還有打工仔極其緊張的reference letter，都會清楚寫明離職理由。以前我一定會勸喻大家選擇自己辭職；現在的我會勸喻大家冷靜，問清楚人事部，兩個選擇之間薪金、利益、補償方面是否一樣，會否有差異，再作決定。

　　萬一僱傭合約不見了，公司有責任提供副本，有疑惑有問題，搵勞工處問清楚再行動，不要一時衝動。

　　好來好去，當然最好，若然唔得，放下就好！