職場

　　『我由大學part time開始加入行業已經超過10年，轉工都轉了幾份但都係做低層Sales。現職公司細所以都唔會有甚麼升職機會。最近有一間外國公司初成立，我upload CV上佢哋網站，近兩日收到Senior Director email，問我對哪一個職位有興趣。我想爭取一下上位機會，所以我就答Assistant Sales Manager，佢約我月底返香港時詳談。

　　我大膽講想做Assistant Manager，會不會令對方覺得好奇怪？會不會影響對方對我的印象？我第一次直接同咁高層溝通對話，怕處理不好，又擔心太過進取。』

　　年青人你有上進心，不想被目前工作公司規模局限，為自己尋找機會，爭取升職上位，是非常鼓舞值得嘉許的事！明明雄心壯志，何解竟然會龜縮，懷疑自己有冇做錯到？

　　先不要被對方的Title嚇窒，驚，就輸一世！搵工請人，說穿了就是一個matching game，你需要的是一份有發展空間潛力的工作，公司需要的是一個有能力勝任工作的員工。對方有你的履歷，當然清楚你目前工作的職級，如果不是對你有好印象，會即時約你日後詳談嗎？不是外國的月亮特別圓，而是中西文化本來大不同。例如你會見的外籍高層，和你on first name basis溝通，你就go with the flow。

　　不過你的確需要做好準備，尤其是心態心理建設。一些必定會問你的問題，你要準備好，千萬不要搭罐頭答案，更加不要自亂心神揣測對方問的每個問題的動機，然後刻意奉承希望答到一個對方喜歡聽的答案。

　　趁機會和你做個熱身，問你一些面試問題好不好？為甚麼apply這份工？對新工作會有甚麼期望？沒有管理經驗的你，如何做AM？如何管理下屬帶領團隊？私人醒你：這間新公司落地香港，需要一個怎麼樣的銷售人才？你可有人脈網絡計劃可以拓展業務搵生意？你是否有信心勝任，是否具備做好這份工的各方面條件？

　　做人不能剛愎自用，亦不應妄自菲薄，不卑不亢有禮貌是應該。今時今日，求職者，無需求工作，是企業僱主，求才若渴，沒有懷才不遇，只有懷才未遇。講到底，無論這份工作結果成或不成，都是一個非常好的實習學習機會。你本來就立於一個不敗之地，還有甚麼需要擔心的？做好準備，胸有成竹，好事自然來！

　　見工成功，記得請我食飯慶功！

　　演講能力了得對職場生涯十分有幫助，但如果能夠掌握問問題技巧，更可謂如虎添翼。其實問問題係一把雙面刃。識得問，可以借用問題去控制會議局面，相反就可能淪為同事笑柄，更有機會得罪上司。要學懂職場問問題之禮儀，先能夠令自己進可攻、退可守。

唔好問點解

　　會議中好多人會習慣「唔明就問」，多發問了解工作情況絕對係好事，但就要懂得喺唔同人面前調節提問方式同力度，尤其喺老細/ 高層們會議中要更加小心。例如好多人鍾意問「點解/ why」，但某啲情況下問why可能帶有不尊重、質疑嘅意味。不少老一輩老細/ 高層們認為，只有上司問下屬「why」，而非下屬問上司。佢哋覺得下屬如有唔明白應自己搵答案，或開會前應已了解情況，唔希望為咗你一個人而浪費與開會人士時間。如果真係遇到必需問「why」嘅時候，可嘗試從另一角度切入，例如向老細於某特定細節上「尋求確定」，減低尷尬情況發生。一來尊重老細向佢確定事情係理所當然，二來點出有可能被忽略嘅細節，有助大家反思。

追加討論

　　另一方面，會議中每個提問都應有其目的，目的可能係尋求協助、確認事情、獲取資訊等。如上述所講，對住老細大多情況屬於確認事情，因其他事並非佢哋著眼點。但如果對住直屬上司，就可以另加一點，嘗試透過提問同上司建立討論。老細同上司分別在於，老細只希望知道結果，唔太理會細節，對比之下上司會多講究細節。上司亦對你工作內容同能力較為了解，所以利用提問加深對事情討論度係最好不過。但緊記一點，討論並非想從上口中直接得到答案，而係旨在得到佢哋嘅建議，唔好畀對方覺得只求答案而缺乏思考，同時學習佢哋工作思維以提升自己能力。

刷存在感

　　大部分打工仔都好怕開會時被老細點名發言，所以會選擇先發制人，不停向與開會人士提問，希望喺老細前面刷存在感以減低被點名嘅機會。不過咁做並非好方法，為問而問不但令會議失去養分，更會被老細或同事們反問/ 追問，最後講多錯多隨時導致火燒連環船，令其他部門一同受罪。所以盡量避免以問問題作為刷存在感嘅工具，要重質不重量，問得精更勝連珠炮發般嘅提問，精準提問先可以令人留下深刻印象。

　　職場對弈係一門藝術，有時重點並非做啲乜可以令自己跑，反而先思考如何避開蠢事，已經勝過好多打工仔甚至職場老手。