【打邊爐求生手冊】火鍋食得健康又好味的5大守則
雖然大家都知打邊爐又肥又唔健康,不過天氣一轉冷,大家都懶理三七廿一,食咗先講!點先可以冇咁罪疚?唔係冇方法嘅,以下五大貼士教大家食得健康又不失美味!
1. 湯底要清
沙嗲湯底係最受港人偏愛既湯底,而麻辣湯底就愈嚟愈受追捧,似乎湯底愈油就愈惹味。不過咁樣打邊爐,熱氣不在話下,脂肪攝取仲同直接飲油冇分別!要健康,都係揀返皮蛋芫茜、蕃茄豆腐等清淡湯底啦。
Dos: 皮蛋芫茜、蕃茄豆腐、黃牙白豆腐湯底、日式鰹魚昆布湯等
Don’ts:沙爹湯底、麻辣湯底
2. 謝絕高脂醬料
醬料健康之訣在天然。以薑、蔥、蒜、鮮辣椒、乾蔥、芫荽等天然香草或香料混合豉油調味,或加入青檸汁、日式柚子醋等增添果酸。盡量避免沙茶醬、麻醬、辣椒油等高脂醬料,一啖一脂肪。
Dos: 日式柚子醋;豉油混合薑、蔥、蒜、鮮辣椒、乾蔥、芫荽等
Don’ts:沙茶醬、麻醬、辣椒油、XO醬
3. 肥牛、內臟脂肪爆標!
十個人打邊爐九個都食肥牛,上好靚肥牛確係正,不過一淥就搞到成個鍋油淋淋,脂肪爆哂標。我唔會叫大家打邊爐淨係食豆腐同瓜菜咁唔接地氣,不過要啖啖肉,都有比較低脂嘅選擇,例如去皮雞肉(強調係去皮)、脆肉鯇、蝦、鮮鮑魚、牛腱或牛脊肉等。動物內臟如雞子、鵝腸等就可免則免。
Dos:去皮雞肉、脆肉鯇、蝦、鮮鮑魚、牛腱或牛脊肉等
Don’ts:肥牛、雞子、鵝腸、午餐肉
4. 瓜菜索油大陷阱
食菜貌似最健康,不過大家都係食完肉先循例食返少少菜,當係「贖罪」。淥完肉既湯底又油又混濁,而加放條生菜落去,其實就好似海綿一樣索滿油,衰多兩錢。菜一定要趁早食,如果堅持最後食,最好倒咗啲湯去,換一鍋清湯淥菜。
Dos:放肉前食菜
Don’ts:在煮過肉的同一鍋湯煮菜
5. 中醫師教煲酸梅湯
廣告教大家打邊爐最啱飲汽水,其實一冷一熱相撞,腸胃差嘅朋友容易出現胃脹、胃抽筋或肚瀉情況。註冊中醫師陳俊傑建議打邊爐時或之後飲酸梅湯,可收虛火。烏梅更有收肝氣、生津解渴、止瀉等功效,特別適合打邊爐飲用。
酸梅湯
材料:烏梅2-4粒、炒甘草5片、水8碗
做法:水滾後文火煮45分鐘。
功效:性平,有收虛火,生津解渴、解暑之效。
註:生甘草微涼,炒甘草則比較平和。胃酸過多者忌服