Sex & Love

　　「最近我個ex約我去海洋公園……佢話有幾個機動遊戲要閂，想一齊再去。」

　　「Theme park date咁浪漫？」

　　「就係唔知想點，佢有女朋友㗎，仲約我。」她接著說：「同佢分手後，有段時間我地申請咗Annual pass，成日去海洋公園，關係有啲曖昧，但大家都無提過一齊返。後尾佢有女朋友，就即刻少咗搵我，我都識做行開嘅……我嘅存在係咪好奇怪呀，哈！」

　　「搵開有條路，悶咪又搵你陪囉，嘿。」我取笑著眼前這位落力陪襯的綠葉。

　　「好『誠心』咁幫佢過度咗嗰段single、苦悶嘅時候，我算咩啫，哈！」她自己也笑得有點牽強，陪到他有下一個對象，還要識趣斷聯，最優秀前度也。

　　「需要後備嗰陣又諗起你呀，你一直都喺度，一直都會應約，聽教聽話！」

　　「佢仲話就嚟開水上樂園，想去喎……」她說得略為遲疑，大概也想到前度約嬉水，泳裝相見是多有畫面。

　　「佢間中都講話同女朋友一齊耐咗，有啲悶……」

　　男人這樣說出口，大概不是純吐苦水，而是帶有暗示？是和女友相處日久，又悶又不好玩，所以想起她？是餘情未了麼？猜不透，但一定不是純情，維持著這種不只是朋友，卻也不會再一起的關係，比朋友情濃更帶點曖昧。

　　身為最熟悉的前任，了解彼此習性，他也懶得再去認識或相約另一位，她永遠是最方便、快捷的選擇。自己無聊了、女友沒有空，亦有長期配合，萬能又熟練的她，怎樣都有人陪，不錯。重點是找前度做備胎，可是無需承諾，無需確定身分，這種若有似無、乾手淨腳的關係多好！

　　明知他已有穩定女友，自己的前度身份，有格格不入麼？當年在他苦悶單身的時候，曾用心地相陪，對他是有情還是友情也好，都是優秀的前度典範，只是他交了新女友便立即把她掉在一旁。儘管她從沒要求甚麼，但誰也不想當個揮之則來，呼之則去的人吧。和他出遊，是相陪相玩，還是加深了曖昧情愫？

　　「其實講到尾，你好又易話圍，咪搵你攝時間囉，哈！」我毫不客氣的說。

　　誠心誠意當個好備胎，付出了時間、心意，對方不過是予取予求，別指望能得到些甚麼。以前也許曾經犯傻，但現在無需再重複，做得再好都只是無名無姓的前度！

　　分手後轉身有很多種形式，當陌生人可以，當朋友也好，做個最佳前度兼布景，不必了。

　　渣男不一定擅長分手，卻擅於逼你提出分手。

　　「我終於同佢分咗手，係三個星期前嘅事。」她告訴我五年的感情終於到了盡頭。

　　「分咗手後呢三個星期，你心情點樣？」我問她。

　　「除咗間中有啲情緒起伏，有些少唔習慣之外，成個人反而有輕鬆咗嘅感覺。唔知係未有咗上一次經驗，呢次無出現食唔到嘢、瞓唔到覺嘅情況。」男友一年前曾戀上另一個女人，她曾提出分手，他向她認錯，承諾跟那女生分手，求她原諒。

　　「我知道我做錯咗，但我哋大家仲鍾意對方，你可唔可以畀個機會我？畀個機會我補償，對你好啲。」她還記得一年前，他求她原諒時說過的話。

　　給他機會修補關係，她做了；但他對她好一些的承諾，除了起初幾個月，往後她完全感受不到。近半年，他對她更加愈來愈挑剔。

　　他在不同事情上常批評她，不是責她大意，就是斥她專制；不是指她自我中心，就是說她心胸窄、不信人。

　　「我希望兩個人多啲行下街、傾下計而唔淨係上床，佢都認為係我畀壓力佢，咁我真係無說話好講！仲有一次我話想去日本旅行，佢話我要求佢做呢樣、做嗰樣，係唔體諒佢。如果講出自己諗法都係錯，我真係唔知乜嘢係啱！」她的經驗令我想起一句話：在烏鴉的世界裏，天鵝也有罪。

　　「我真係有諗過：我係未佢所講嘅咁差？後來我發現，原來佢又搭上另一個女人，再次出軌，佢哋仲一齊去過旅行。」她吸了口氣繼續說：「唔同嘅係，上次佢親口認自己做錯，但呢一次佢就不斷話我做得差。」

　　「如果佢真係鍾意另一個人，可以同我講，雖然我都會傷心，但起碼係對關係嘅一種尊重。做男人做到咁，都算窩囊。」她用堅定語氣說。

　　面對犯錯，有些人會檢視自己、承認責任；有些人會諉過於人，賊喊捉賊，將加害者角色說成是受害者身份。渣男的渣，不只是面對感情不認真，就連對面對自己的勇氣也沒有。

　　感情關係裏，可以不愛，卻沒有傷害別人的權利。她說分手之後，心情反覺得輕鬆，或許說明了一件事：她離開的腳步，是看清了感情狀況的真實。