按盤價 
《小傳日記》車股曾經係孖屐最熱炒嘅板塊，但係玩家愈來愈多，終於令到市場飽和，汰弱
留強嘅時代已經開始。理想（０２０１５）靠著高端配置同大車艙喺新勢力之中跑出，本來打算
繼續針對用家對呢方面嘅喜好繼續落去，但係似乎已經摸到頂。
理想ＭＥＧＡ ５６萬人仔一架，車艙長度有成３﹒８米，夠曬貴又夠曬大，但係開賣以來
成績方面真係令人跌眼鏡。開賣第四日，已經有數據公布，理想ＭＥＧＡ落大訂嘅只有３２１８
張單，撻訂嘅居然有超過１００００架！可能連老闆李想都無諗過ＭＥＧＡ會跣軚成咁，以往新
車開賣之後都會喺微博風騷曬成績，但今次當堂無咗影。
ＭＥＧＡ銷售撻Ｑ，除咗可能係價錢太貴之外，車身太大令外型更加掗拃，已經逼近一架貨
ｖａｎ咁大，可能因為咁，更加被人笑佢似靈車，仲Ｐ咗個「奠」字畀佢。雖然只係Ｐ相，但係
都的確倒米，賣得好隨你Ｐ又點話，而家賣唔夠數，梗係崩口人忌崩口碗。事後理想高調反擊呢
場「惡意Ｐ圖」，敲鑼打鼓要問責搞Ｐ圖嘅始作佣者。
又難怪理想被辣㷫，買新車始終都係好事，而且買得理想咁大架車嘅通常都係家庭客，被Ｐ
圖變成靈車咁唔老黎，顧家嘅潛在買家又點會想畀屋企人咁唔吉利，所以或多或少都係對銷量有
影響。
如果Ｐ圖真係有心人裝無心人，呢招可以話相當成功，大手一揮就可以令ＭＥＧＡ撻訂過萬
張單，如今神州電動車業競爭咁大，硬招軟招揦鮓招都要出盡，所以同行出招嘅可能性都排除唔
曬。但事已至此，比起打鑼咁對付Ｐ圖人，更加重要就係樣救返銷情。近期有傳理想計劃都要下
調ＭＥＧＡ全年銷量目標由７至８萬架去到５至６萬架，但都未證實。
ＭＥＧＡ嘅成績反映對貴車嘅取態，貴唔係唔得，但貴得嚟都要物有所值。如今市場咁多選
擇，要令消費者覺得物超所值先可以吸引到佢入手。同時都證明呢場車業內捲已經捲到要出揦鮓
招嘅地步，所以蘋果都趁勢縮沙，都算係明智之舉，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】本港主要銀行跟隨美聯儲減息，你對樓市前景有否信心？► 立即投票
