《魚缸博客》呢兩日阿爺又吹風話救市,博客第一反應就係:睇定少少先。博客早嗰排係恒
指升兩三千點嗰排就轉咗MPF去港股,點知內地一復市復工就跌成三四千點,博客個MPF都
輸成兩三萬,拿拿聲都係轉返美股先算。
仲記得早兩個月大升市個陣,個個後生仔都話要開戶借錢炒股,點知阿爺一出聲話要「曼牛
」,年輕人立即變成「年輕韭菜」,真係喊都無謂;所以呢次又話「救市」,都唔知係咪狼來了
,要散戶再入市都幾難下。
其實有幾個關鍵位決定恒指仲有無力上,第一就係美國減息問題,而家減減下就話暫停,市
場都無水,升條毛咩;其次,港股目前缺乏一啲「真正高科技」股份,呢個係美股點解會比港股
優勝嘅地方,所謂「高科技」,好似Tesla搞太空旅行、Nvidia搞AI晶片,發展係
未來十幾年嘅事。
而反看恒指成分股,多數都係地產股、銀行股、消費股、石油股為主,最高科技都係阿里巴
巴(09988)、京東(09618)同百度(09888),但都係做網購或者雲業務,都
係已經相當成熟行業,大行無得「炒未來」推高估值,所以恒指炒來炒去都係兩萬點上落。
對於呢次升市,博客都係認為審慎為主,可以先繼續觀望一下,畢竟近日升到21000又
被人打返落,證明樓上仲有好多人要走貨,等佢地換多兩手先講啦!
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇?】敘利亞反對派攻入首都,阿薩德政府倒台,你認為事件對對盟友伊俄構成何種影響?► 立即投票