【清邁直擊】買地起屋 港人打造香港村
13/09/2018
長租篇:單車六壯士組合作社,七十後金融人覓第二人生
距離Coffee的屋苑地盤不遠,同樣屬於清邁東邊的San Kamphaeng (山甘烹)區,在一個市場附近,穿過當地的民居和學校,在一片青綠的米田包圍下,70後港人Carlo帶記者到達一塊新簇的住宅地。
項目地點︰清邁San Kamphaeug (山甘烹)
佔地面積︰約7萬平方呎
租地總數︰共12塊
每塊地面積︰4,360平方呎
租地價格︰約30多萬元
加建房屋︰室內約1,500平方呎連地及基本裝修,約110萬元,若加泳池則需約135萬元
參考網址︰facebook/清邁優質生活/享受人生/計劃退休
剛剛鋪好的馬路,電線桿整齊豎立,這是他與5名香港單車友組成合作社後,向當地泰國人以「長租」90年形式租用的土地。他把這塊約7萬平方呎的土地劃分為12塊,租賃的主要對象為香港人,目前已全數「租出」,希望日後慢慢組成一個「香港村」,讓港人在當地開始第二人生。
一拍即合 覓地作發展
從事金融業逾17年的Carlo,曾任職銀行財務、信用卡,及貸款等,直至兩年前經歷工作壓力爆煲,決心尋找人生下半場。當時在匯豐銀行工作的他,看不到前路,「最失落係2012年開始,公司宣布要3年裁減人手,我哋就係首當其衝,要去Cut人,每年最大既Achievement就係炒幾多人,有一年仲攞晒獎,是環球2萬多個Project入面攞金獎(即第二名,第一名是白金獎)。」
得獎背後其實是傷痛,至今Carlo仍耿耿於懷,「全球第二嘅成績,就係Cut了350萬美元,等於14個Headcounts,係一件好唔開心嘅事,好氣餒,每一年達標,下一年又要突破,手上的工作不是為公司去賺錢,而係不斷去削減成本。」
直至2016年,身體出現毛病,需要動手術,Carlo決定祼辭,拋開一切,去西藏上高山,到菲律賓潛深海。豈料,旅行期間一張平價機票,把他帶到去清邁,「當初最深刻印象係清邁人好單純,好友善,所以就鍾意咗呢個城市。」
在清邁Hea遊期間,他漸漸發現原來當地有很多發展機會,「開初搵下資料,睇下清邁值唔值得做呢?有無得投資呢?」後來返港後與身邊的單車友分享,結果一拍即合,落實合資以合作社形式,在清邁覓地,「我們6個中年單車友,來自不同專業,有做生意、做展覽、有公務員、有做銀行、有移民英國嘅工程師,由於平日工作壓力大,周末未天光就約埋去踩單車,個個想要有Life,想要健康,覺得自己肚腩太大。」
單車六壯士柴娃娃想發夢,「投資清邁,預埋我啦!幾錢呀?我想買個Dream呀!」於是,他們在香港開公司,然後再到泰國開公司,總投資金額近8位數字。
首塊地全數租出後,Carlo隨即出動找一塊新地皮為十名同學興建一條「同學村」
小試牛刀 成功感倍增
懷著共同目標,在清邁的投資未必一定要搵到錢,Carlo笑言,「最壞打算就係一齊喺清邁退休,喺自己條村到一齊吹水、一齊飲啤酒,一個煮飯、一個整車、一個做娛樂大隊長,總之搵到我哋嘅Second Life已經係我哋嘅目標。」
買樓上車在香港已經難過登天,更何況買地?大部分港人都沒有買地經驗,即使清邁地價遠較香港便宜,但買地也不是想買就買的事。學會一點當地文化,Carlo開始掌握到自己的優勢,「買地係一件好痛苦嘅事,唔係理所當然。後來慢慢發現,原來好多泰國業主好願意長租畀外國人,但搵唔到需求,其實我可以做呢個配對,Demand就係香港人。」由零開始,他不斷向當地人學習,怎樣向政府申請轉換土地用途,怎樣分割12塊地,然後在該土地範圍負責起馬路,拉水電等,「要融入當地人文代,跟他們的步伐,唔可以用香港嘅標準放落去。」
與當地人的合作和溝通,Carlo慢慢從他們身上學會買地的學問。
在生命上轉換了跑道,Carlo得到的滿足感外人無法感受,並計劃在清邁退休,「我很喜歡嘗試新鮮嘢,同唔同人傾計,在清邁的成功感唔可以用錢去衡量,收入沒有以前一半,但開心程度係以前嘅5、6倍!」
小試牛刀的第一塊土地,已經全數「租出」,他透露,主要客路是一群香港中年人士,每塊小地皮實用面積約4,360平方呎,吸引到不少香港人以30多萬元去「長租」90年,可能暫時先放貨櫃或組合屋,到退休才興建房屋居住。在租用的土地若興建兩層共1,500平方呎室內空間,加3,000平方呎車位及花園,連土地及基本裝修費用約110萬元,若加設泳池則合共需約135萬元。
壓力爆煲 人生Reset
「租出」首塊土地後,Carlo正著力尋找下一塊土地,構思成為一個讓香港人去發夢,去展開第二人生的樂土。「我們的目標不是在清邁做地產商或發展商,而係將一個Dream帶畀一班志同道合嘅人,一起建設一個適合我哋香港人自己住嘅地方。」
曾經歷工作壓力爆煲,Carlo對人生有不同的看法,「人生係有要夢想,唔係晚晚做到九點十點,返到屋企好攰,摸下仔女個頭,瞓覺,Good Night,然後無時間無Life,呢個唔係一個人生。」
Carlo一班單車友希望在清邁展開第二人生。
他希望可以找到幾個想法接近的香港人成為合作夥伴,「我哋呢班人在精神上已被摧殘得好犀利,在工作上已經有地位有財產,跑車唔係我哋想要嘅,生意都唔係。我最想要嘅,就係想要有質素的生活,條路行到一半,要有一個Restart。原來世界好大,但香港的生活卻無得透氣,思想好窄,上唔上到車買樓差不多就係人生唯一嘅夢想。」
怎樣開始人生下半場呢?他嚮往清邁的慢活,一來物價平,二來質素高,「以前對泰國印象係好窮嘅地方,但而家發現清邁有好多好靚嘅屋苑,購物、商場、食嘢樣樣都有。」
不是要退休,而是要第二人生。「退就就是退下火線,唔做嘢了!但Second Life係仲有嘢想去Achieve,無論係事業上、工作上,做自己喜歡做嘅嘢,但唔一定係用錢去衡量。例如有朋友教欖球,呢到地大,攪乜都得,好適合開展人生下半場。」
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情