《笑傲缸湖》話說上年Microsoft(微軟)趁聖誕節臨近,就出咗幾款用自己
Logo同埋小畫家做主題嘅聖誕冷衫,湊吓過節氣氛,點知非常熱賣,所以今年又再出多次,
而今年就係用踩地雷做主題,銷情都繼續暢旺。
外國人過聖誕節,其中一個習俗就係會買件「老土聖誕冷衫」(Ugly
Christmas Sweater)嚟應節。其實呢個唔係好傳統嘅習俗,係喺80年代興
起著呢種花碌碌、多顏色又多圖案嘅冷衫詔聖誕,去到90年代就變咗姨媽姑姐先會送畀人嘅老
土嘢。時移世易,「老土盡頭便是型」,而家好多外國人都會聖誕買呢種花碌碌都爆嘅冷衫,當
係懷舊同大家笑吓。
講返Microsoft件老土冷衫,用踩地雷介面做主題,以鮮藍色加雪花圖案做背景,
用踩地雷嘅一格格砌咗棵聖誕樹出嚟,左邊膊頭位仲有「縮細、放大、交叉」個選項欄。而嗰兩
格顯示仲有幾多炸彈個數字分別係「1990」同「2021」,而1990就係踩地雷面世嗰
年,所以真係色彩繽紛之餘又夠曬懷舊!
不過一件都唔平,舊年一件都係70蚊美金,今年仲加價要75蚊美金一件,都成500幾
銀港紙。不過Bill Gates咁大愛,啲錢其實都會攞去做慈善嘅,上年每賣一件就捐
20蚊美金,而今年就會一炮過捐十萬美金,幫助殘疾人士可以正常打機。
盈盈覺得呢件都算係潮物,撳入去官網諗住追返件,點知今輪已經沽清!上年好次12底臨
聖誕節前會返多一轉貨,唔知今年會唔會呢?踩地雷fans一定要睇實!《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】本港主要銀行跟隨美聯儲減息,你對樓市前景有否信心?► 立即投票