RSS訂閱 《笑傲缸湖》本身有望成為香江今年最大型新股嘅啤酒股百威亞太（０１８７６），近日公
布擱置上市計劃，真係令人大跌眼鏡，並再為近日無咩大起色嘅「孖屐」大澆冷水。有缸友借咗
孖展去炒自然要蝕息。不過，最肉赤嘅莫過於幫百威亞太搞ＩＰＯ上市嘅兩間投行大摩同細摩（
摩通），因為吃到嘴邊嘅肥雞（佣金收入）就咁無咗，合共最多１﹒７億銀美金，即超過１３億
港紙！
百威亞係由全球最大嘅啤酒商百威英博分析出嚟，原本諗住ＩＰＯ集資最多７６４億銀，如
果成功上市，就會超過Ｕｂｅｒ五月喺花旗國上市嘅集資規模。不過，呢次ＩＰＯ少有地無引入
任何基石投資者。
大摩同細摩係百威亞太上市嘅保薦人，有報道引述知情人士就話，大細摩本應可以收到合共
１﹒４億美金至１﹒７億美金嘅佣金收入，以為今次實食冇黐牙啦，點知依家見財化水！有大行
嘅分析師更用「慘敗」嚟形容呢單「刁」，並將原因歸究大細摩同百威英博為首嘅銀團，未能妥
善定價，去吸引基石投資者。
睇返百威亞太原本嘅招股價，就介乎４０銀至４７銀，但之前孖屐都有聲音話佢定價太高，
市盈率約３８倍至４５倍，比青啤（００１６８）要高。
除咗無咗佣金收入，兩間投行嘅聲譽分分鐘都可能受影響。有數據顯示，大摩自２０１７年
以來，就一直喺亞太地區嘅股票發行排第一；而細摩就喺股權交易方面排第八。唔知會唔會因為
呢次事件令人對佢地失去信心呢？
今次公司突然腰斬上市計劃，事後都未有詳細解釋原因，只係話部分原因係基於當前「孖屐
」而作出嘅決定。盈盈認為，缸友唔使咁快失望嘅，相信只係暫緩一下，隨時「孖屐」好返Ｄ，
即刻重啟上市計劃哩！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】本港主要銀行跟隨美聯儲減息，你對樓市前景有否信心？► 立即投票
