《笑傲缸湖》自從上個月,圍棋世界第一高手柯潔直落3盤慘負予人工智能AlphaGo
之後,圍棋呢個人類最後壁壘正式宣告被攻破。柯潔當時仲一度淚灑當場,自言同
AlphaGo有極大距離,「只能估到佢一半嘅棋」。
唔少職業棋手都話,雖然為人類智慧水平被超越而感到可惜,但AI卻同時為我哋帶嚟一個
新天地,帶領人類繼續進步。一眾圍棋迷如果想再次跟AI學習,就唔好錯過嚟緊嘅夢百合盃世
界圍棋公開賽喇。
今次大會破例畀東瀛AI「深禪」(DeepZenGo)持外卡參賽,係首次有AI參加
人類嘅公開比賽。又咁啱得咁橋,「深禪」喺64強將會對決泡菜國五段棋手申旻埈,而申旻埈
就係第一位對戰AlphaGo嘅名將李世石嘅徒弟仔,唔知佢可唔可以為師傅報返輸畀AI嘅
一敗之仇呢?
至於好大機會同「深禪」喺決賽相遇嘅柯潔就話好無奈,「唔支持、唔贊同、唔想接受深禪
突然參賽,但已經發生咗就冇辦法啦」。聽似柯潔有點兒酸溜溜,但諗深一層,參加比賽無非為
拎冠軍啫,無啦啦多咗個高幾個層次嘅絕世高手出場,都幾打擊信心架。點都好,希望今次人類
可以爭返啖氣啦!《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
【etnet 30周年】多重慶祝活動一浪接一浪,好禮連環賞! ► 即睇詳情