《魚缸博客》今朝恒指高開５９點或升０﹒３％，報１７２６３，之後升幅逐步擴大到
１３６點，高見１７３３９，但之後持續回調，目前倒跌。今個星期市場焦點，唔使問梗係後日
（１５日）嘅習拜會啦，但相信市場唔會有太大期望，免得期望愈大，失望愈大。
望下牛熊證分布，上星期１７２００至１７２９９牛證重貨區，但即月期指上星期五（１０
日）最低跌到１７１９９，正好殺晒，但好友喺１６８００再築長城，我估上星期五淡友殺落去
只係偷雞成功，好友又冇咩防備，依家習拜會舉行在即，好淡雙方應該都唔會有咩大動作住，等
會面完之後，睇下有咩講再行動較安全。
個股今日（１３日）講下隻美麗田園（０２３７３），執筆時升緊２﹒８％，報１３﹒２６
元，但成交疏落，暫時得４０００股，涉資５萬元。美麗田園主要喺內地從事傳統美容服務、醫
美，仲有提供同亞健康評估同干預服務。都掂到些少「醫」（醫美）呢個範疇，但今年１月１６
號上市以嚟，股價喺上市第一日嘅高位就已經係上市新高，之後反覆下跌，或者咁樣就解釋到點
解公司頻頻回購。
公司唔係無錢賺，截至今年６月底止營業額超過１０億人仔，股東應佔溢利都接近１﹒１２
億人仔，仲派０﹒３４港銀股息，當然就算以今朝最新價１２﹒９銀計，預期周息率都只係３厘
７，唔算吸引。不過，股價走勢就有轉升跡象，日線圖顯示股價喺１０月底升破５０天線（現約
１１﹒３９），同埋營造緊上升旗形。從周線圖睇，股價已經破咗１０周線，依家挑戰緊２０周
線（現約１４﹒１），估計下個挑戰目標係１８銀，以現價買入都有超過３５％升幅，不妨諗諗
，收低過１１﹒７６銀先行止蝕。（ｐｃ）
《編者按》本欄搜羅即市傳聞，惟消息未經證實，《經濟通》亦不保證內容之準確性。
樂本健【秋日開倉26 - 27/9】保健品低至$20！► 火速行動
