《小傳日記》政府積極推廣夜繽紛活動，最新廟街夜市開幕無耐就出現打鬥事件，仲被人揶
揄「今次真係夜繽紛囉」。不過，事實上香港某部分都係繽紛咗，起碼多咗間奶茶檔叫蜜雪冰城
。
之前傳緊會來本地魚缸敲鑼嘅蜜雪冰城，結果開舖仲快過上市，喺旺角「最旺嗰個角」開香
港第一間分店，被傳係為ＩＰＯ試驗水溫。前日（１８日）正式喺旺角港鐵站Ｅ２出口對開舖位
開幕，話明係「最旺角」舖位，每月租金盛惠２０萬銀。
蜜雪冰城喺神州奶茶舖分級係屬於最低端位置，每杯飲品售價幾蚊人仔，最貴都唔過十蚊人
仔，非常之經濟實惠，通常都係學生幫襯為主。不過落到來香港，租個咁貴嘅舖位，唔多唔少都
要反映呎售價上面。睇睇ｍｅｎｕ，普遍各款飲品都比起神州分店嘅貨要貴一個ｄｏｕｂ，最貴
一杯楊枝甘露賣２０蚊港紙，深圳一杯只係賣１０蚊人仔。
雖然貴咗咁多，不過作為攻港第一炮，蜜雪冰城都吸引到大批中學生幫襯。前日開幕兼夾假
期前夕，就快放聖誕假嘅中學生都即刻去飲頭啖湯，門口大排長龍入面有九成都係中學生。莫講
話Ｆａｃｅｂｏｏｋ，如今００後嘅中學生已經只係用抖音，據講有唔少同學喺抖音見到就放學
衝去買。第一日開幕咁受歡迎，相信蜜雪冰城好快就會見到「最旺舖」嘅實力，不過係咪值回票
價就要睇蜜雪冰城嘅實力。
唔只蜜雪冰城，近期有唔少神州上市餐飲企業都攻港，包括呷哺呷哺（００５２０）同旗下
下湊湊火鍋、九毛九（０９９２２）旗下太二酸菜魚，甚至係之前敗走嘅喜茶都重新落來開舖。
呢個下半年咁「繽紛」，可能都同港人北上消費熱潮有關，神州企業見到港人喺深圳嘅熱度，自
然見到香港市場嘅商機，索性落來開檔，關都唔使你過。假如神州企業已經開始過埋深圳河，夜
晚再繽紛都唔知繽紛著誰人個袋，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【etnet 30周年】多重慶祝活動一浪接一浪，好禮連環賞！ ► 即睇詳情
