《楠楠自語－莫灝楠》再談Tesla

　　其實自己有一段時間無update Tesla嘅基本面，本身唔係特別鍾意Elon Musk，覺得佢係黐線佬，將芯片作為主戰場嘅我，偶像當然係張忠謀。記得大概兩年前做過個節目，自己覺得Tesla毛利太低，都係造車。無可否認，當年嘅估值確有點過火，但今日再睇多次，Tesla實在發展緊。有機會/已經盈利緊嘅項目有啲咩？
　
　　我是一個滿腦子電晶體嘅人，有咩冤枉咗Elon BB請更正。
　
1) 車/Robotaxi/FSD
　
　　賣車就無乜特別好講了，大家睇住個銷售數據就OK。佢賣咗咁耐車，我仲要逐個車型喺呢度拆出嚟計數都無意思。賣多賣少，Tesla股價都會有一個非常高嘅premium，所以個價值唔係賣幾多車，而係如果Robotaxi & FSD(Full Self Driving)喺更多美國省份批到出嚟，甚至將來商業化，可以帶動幾多sale？
　
　　以Elon BB依家做咗Trump Trump頭馬嚟講，紅色嘅state要批Robotaxi易如反掌，都係大勢所趨，但有幾個問題依家仍然懸而未決。
　
　　自動駕駛技術是否真正成熟？筆者經常有問題嘅係，究竟自動駕駛係咪可以完全用視覺感應器就搞掂所有問題？人眼嘅感官細胞比鏡頭敏銳N倍，曝光超快，無需要對焦就即刻可以遠近都睇到，但鏡頭唔得。
　
　　Elon Musk強調自己無需要用LiDar（激光雷達），就可以解決呢個問題。佢依家係用多個鏡頭去感應唔同嘅距離，可以解決部分問題，但總有盲點；對焦需時，撞到埋去先對到焦就蚊瞓。所以究竟最後FSD係咪可以完全做到Level 5？自動駕駛仍然好多變數。
　
　　隔籬舖Google嘅Waymo，就一早已經用晒LiDar、鏡頭、鐳射測距儀，成本係貴，但無上述嘅問題，依家喺Phoenix、Arizona、LA、San Francisco已經有試點玩緊。Google將會係Elon最大嘅競爭對手。
　
　　如果呢個問題解決到，Tesla每年賣多十萬八萬部車，輕輕鬆鬆。
　
2) 儲能
　
　　睇番收入breakdown，儲能基數非常細，但增速好快，乜料？
　
　　簡單講，就係一個超巨型「尿袋」。朝早個個開電腦開冷氣，用電量超高，電廠負荷唔到，就搵個尿袋幫手頂住；夜晚用電量低，就將多餘嘅電力儲起。
　
　　以前儲能超級貴，因為要搵個水壩，用高低差，抽水/排洪嚟儲能。但依家因為有鋰電池，碳酸鋰個價都由高位跌咗七成，所以用鋰電池嚟儲能嘅效益高咗好多。呢個係大勢所趨，雖然基數細，但係個增長速度會繼續幾快吓。
　
3) 個人魅力，同埋其他嘢
　
　　連半導體大佬「皮褸黃」都話Elon Musk係超人，講真你又真係無辦法唔佩服佢execution嘅能力。唔好講話造車同自動駕駛領先時代，淨係講低軌衛星同上太空，呢個年代都無乜人可以及得上佢。依家仲要入埋政府做嘢，佢都可以話係呢一個時代嘅Tony Stark。
　
　　成間Tesla嘅估值，就算你當自動駕駛同埋Robotaxi完全商業化，再推高啲儲能業務個增長，你點都會覺得貴到黐線。所以我覺得依家100倍PE，有一半係畀咗佢個人格魅力。呢間係咪一間好公司，就係決定喺你信唔信佢。
　
　　小小總結，我點都有個分析員底喺度，人格魅力呢家嘢我真係量化唔到。人只能賺自己認知範圍內嘅錢，既然睇唔明，咁就唔好買。但係都無需要話佢係騙局，就算睇淡，都唔一定要造淡。《南華金融集團副總監　莫灝楠》
　
*《經濟通》所刊的署名及/或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。