2020年話咁快已經過咗四分之三,又要迎來缸友最怕嘅10月份!10月份總係缸友十分「棹忌」嘅日子,事關有歷史印證,10月份不時出現股災,就如同魔咒一樣!不過,過咗咁多年,股災魔咒又係唔係依然未消散?阿臣一於做個統計,應該就可以知道係真魔咒定假傳聞啦!
*過去廿年10月跌市機率三成,「十月魔咒」約十年一遇*
喺開始講「十月魔咒」前,首先應該同大家講返佢嘅由來先。心水清嘅缸友應該好記得喺1987年10月份發生嘅「黑色星期一」,嗰次股災,淨計單月急瀉超過四成三。事件由當月16號嘅星期五發生,美股道指當日突然挫低5%,拖累亞洲星期一(19日)開市就出現恐慌性拋售,香江當日插水逾一成,而美股當晚亦隨亞洲市急挫,道指係跌成差唔多23巴仙,標普500指數市值更加要蒸發超過兩成。事件令到聯交所宣布停市4日,成為全球唯一需要停市嘅地區,而10月26日復市,魚缸自然跌到阿媽都唔認得,急挫三分之一。
自此之後,差唔多每隔十年,都似乎會出現一次10月股災魔咒,包括係1997年嘅亞洲金融風暴、2008年嘅金融海嘯,分別跌二成九及二成二;仲有2018年由中美貿易戰同花旗國長債息急升,令到大市要跌一成咁多。
我吔再一齊睇返過去20年嘅大市表現,參考經濟通報價機圖表,由2000年至今恒指表現都係反覆上升,當中波動比較明顯就一定喺2008年金融海嘯嘅跌市!魚缸由2007年10月高位31958點開始,喺短短一年間暴跌去到2008年10月嘅10676點低位,跌幅足足有約67%,而整個十月份跌4047點或22巴仙!整合返以上資料,就可以睇到10月「大熊」真係有佢「出沒」嘅定律。
不過,對比埋其他年份,啫喺2000年至2019年二十年間,10月份係跌市嘅數據只佔6個,而且並唔係每一次跌市都領跌全年股市表現,所以其實都反映到10月股災預言並唔係年年都應驗。只不過空穴來風都未必無因,數據反映股災大約每十年出現一次,例如係喺2008年同2018年嘅10月份,而且除咗係當年跌幅最大月份之外,以十年計算亦係領跌。所以如果按呢個模式推算,預計大約2028年先會再出現股災都唔定!
表列廿年來10月份魚缸變化:
年份 十月變幅 年份 十月變幅
------------------------------------─---
2000 -753點/ 4﹒8% ︱ 2010 +738點/ 3﹒3%
2001 +123點/ 1﹒2% ︱ 2011 +2272點/12﹒9%
2002 +369點/ 4﹒1% ︱ 2012 +801點/ 3﹒8%
2003 +960點/ 8﹒6% ︱ 2013 +346點/ 1﹒5%
2004 -65點/ 0﹒5% ︱ 2014 +1065點/ 4﹒6%
2005 -1042點/ 6﹒8% ︱ 2015 +1793點/ 8﹒6%
2006 +781點/ 4﹒5% ︱ 2016 -362點/ 1﹒6%
2007 +4210點/15﹒5% ︱ 2017 +691點/ 2﹒5%
2008 -4047點/22﹒5% ︱ 2018 -2808點/10﹒1%
2009 +797點/ 3﹒8% ︱ 2019 +814點/ 3﹒1%
-----------------------------------------
*大市波動因素延續下來,特朗普為選票大打「中國牌」*
不過,適逢今年發生各項大事,阿臣都估唔到呢個魔咒定律會唔會被打破!而今年10月份個市到底有咩消息需要睇實呢?阿臣就整理咗一部分資料,睇完應該可以幫大家平安渡過近期嘅風暴啦!
魚缸由呢兩年開始面對唔同消息夾擊,走勢比較弱一啲。當中影響最大就數中美關係持續緊張。自貿易戰喺2018年開波,到依加仍未完場。而香江作為中美磨心,面對任何制裁行動都會率先反映!例如早前美國取消本港特殊地位,最近亦要將「Made in HK」產品標籤改為「Made in China」。現時最關鍵嘅,就係11月花旗國總統選舉,可以預視到特朗普同死對頭拜登嘅虎狼之爭愈演愈烈,而特朗普為咗選票,應該會大打「中國牌」爭取選民支持,到時中美「開拖」風險加劇,相信會令大市更波動。
再講,依加全球都面對緊新冠肺炎疫情,除咗大市欠缺動力飛唔起外,本港唔少商家同市民亦正經歷「寒冬期」。依加疫情再次反覆,代表經濟同社會真正復甦都仲有一段距離。加上大家憂慮一旦步入秋冬季,疫情反彈加大,到時或者會再開展新一輛限制同隔離措施,魚缸自然無運行。
與此同時,近年本港社會及政治不穩都會影響到大市走勢。雖然港區國安法已經落實,表面上已穩住整體局勢,但不時仍有示威活動,社會仍有暗湧,要化解相信仍要一段長時間同大家嘅努力。故此市場氣氛或者暫時都會比較謹慎啲。
*大市走淡宜先觀望,抽新股寶尊電商先炒螞蟻概念*
睇返今個星期,大市表現都比較弱勢一啲,雖然阿臣估今年十月急挫跌機會唔大,但因為市場氣氛唔多好,建議缸友暫時都觀望一吓先。而想入手舊經濟股都建議要謹慎啲,事關重磅藍籌匯控(00005)今早(23日)已經跌穿咗28銀嘅「世紀供股價」,大有機會拖累傳統經濟板塊同大市表現。
喺咁淡嘅市況之中,阿臣覺得依然可以入飛抽下新股,上星期想入手嘅福祿控股
(02101)同樂享互動(06988)掛牌表現較預期差,今個星期不會部署該兩股。但嚟緊上市嘅寶尊電商-SW(09991)值得留意一下,事關佢業務屬於電商概念,相信之後螞蟻集團上市都會利好行業走上,或者可以炒一轉先,阿臣先入飛抽兩手寶尊電商,而個倉今個星期暫時按兵不動。
表列截至9月23日早上11時15分阿臣投資組合表現:
股份 股數 平均買入價(元) 現價(元) 總值(元)
---------------------------------------
港股:
SPDR金ETF 10股 1097﹒00 1379﹒50 13795
平安好醫生 200股 52﹒90 112﹒00 22400
阿里巴巴 200股 210﹒50 267﹒40 53480
港交所 100股 264﹒50 367﹒20 36720
---------------------------------------
股票市值 : 126395元
凍結資金 : 約20989元
剩餘現金 : 87880元
組合淨值 : 235264元
組合本月收益表現: -1﹒04%(截至上月底止組合淨值:237729元)
組合累計收益表現: +124﹒1%(本金105000元計)(2016年8月開倉)
*數據截至9月23日早上11時15分
【etnet 30周年】多重慶祝活動一浪接一浪,好禮連環賞! ► 即睇詳情