香港旅遊發展局日前公布，6月初步訪港旅客313萬人次，比舊年同期升14%。累計本港今年上半年，共錄得約2100萬訪港旅客人次，按年增加64%，當中內地旅客約1610萬人次，按年多近6成；非內地旅客量為500萬人次，按年增長約8成。
連串數字顯示，香港入境旅客人數大幅增加。照咁講，同旅客生意息息相關，如化妝品、珠寶零售等股份應該受到追捧，股價應該係咁升先係。只可惜，今時唔同往日，而家內地旅客消費模式轉變，落嚟打卡嘅多，買嘢嘅少。仲要掉返轉，吸咗大量本地消費者北上。所以，昔日食正自由行條水嘅化妝品店風光不再。
講起化妝品店，大家可能只會想起莎莎(00178)，畢竟係行業龍頭，特別受內地自由行旅客歡迎。但除咗莎莎，仲有一間差啲被遺忘嘅卓悅(00653)。卓悅股價今個月經歷幾次插水，7月2號跌15.6%、7月4日插35.7%、7月8號更大插41.9%。股價7月1號收市價有4仙半，到7月8號跌至1仙8，短短幾日唔見咗6成。
大跌之後，持有卓悅65.12%股權嘅大股東兼執行董事陳健文出來澄清，話注意到8號股價下跌，並重申自6月20號以來未出售任何股份，且所持股份並無被強制清算。本以為澄清過後，大股東一定會進行維穩，股價應該會止跌回升。結果，股價之後一樣升唔起，持續喺低位浮沉。
更令人意外嘅係，幾日之後，根據聯交所資料，大股東陳健文於16日號減持3000萬股，每股平均價1仙7，涉資51萬銀。作為大股東，股價已經跌成咁，佢無入市支持，反而再踩多一腳，唔通真係咁等錢使，51萬銀都唔放過？明知自己身為大股東，喺股價風雨飄搖時出貨必定會引起負面反應，都堅持要沽貨。可想而知，佢一係真係真係好等錢使，一係唔睇好自己間公司。無論係邊個原因都好，其實陳老闆有更好嘅選擇。
卓悅現時市值只得8千萬銀，但公司連續兩年有錢賺，舊年都賺5千幾萬銀，現價市盈率得果1倍幾，真係抵到爛。如果陳老闆肯賣盤，相信市價遠遠唔止8千幾萬銀，賣咗盤，陳老闆又唔使幾十萬銀幾十萬銀咁逐啲出貨，咁咪仲好。
《編者按》本欄搜羅即市傳聞，惟消息未經證實，《經濟通》亦不保證內容之準確性。
樂本健【秋日開倉26 - 27/9】保健品低至$20！► 火速行動
42,313.00
5,738.17
