高鐵一地兩檢詳情正式公布晒之後，一如預期，泛民全線反對、建制齊整護航，整件事，由政治化變成為超級政治化，由交通問題變成為法治問題。喺噚日（3日）立法會內務委員會之上，泛民喺會後圍堵一位司長、兩位局長，表面睇係抗爭一部分，實際上係「狗急跳牆」，佢地希望用更激烈抗爭去引起大眾嘅關注同支持；白啲咁講，支持面依家係傾斜向政府嗰面。

　　就住高鐵一地兩檢民意同預期有幾大落差，Tina同一位曾經處理過高鐵政策嘅政府官員傾過。佢就話，當日拍板要搞高鐵，曾蔭權政府已經知道一地兩檢係事在必行。煲呔曾嘅政治智慧當然有返咁上下；經歷過23條立法之後，已經知道一地兩檢係燙手山芋，如果將一地兩檢同高鐵綁埋一齊，肯定社會大反彈。唯一可行之道，就係先起咗高鐵，生米變熟飯，到時先再搬一地兩檢出嚟，反應肯定會細好多。

　　呢位官員指出，依照近日社會輿論睇，前朝政府嘅判斷真係非常準確；佢更估計，泛民喺一地兩檢議題上面已經搞唔出花樣，普遍市民都唔多介意有個中國口岸喺自己屋企正中心，最緊要就係方便。主流民意都會偏向支持一地兩檢，縱然百分百會受到司法嘅挑戰，但估計阿爺同特區政府都已經預計好所有嘅可能性，最終絕招都係人大釋法。有釋法，萬事皆通。

　　最重要一點，阿爺係出盡力搞高鐵外交，如果連自己國家都鋪唔晒高鐵網，咁仲點起示範作用？香港高鐵嘅重要之處，係香港有完善國際機場網絡，海外旅客坐飛機到香港，好易就經機鐵駁入中國高鐵網絡，將中國連繫全球，所以香港高鐵係一個好重要嘅「政治任務」，係完成祖國高鐵夢嘅其中重要一環，所以一地兩檢，唔可能係其中一個選項，只能夠係唯一選項。

　　有人可能會話，咁樣犧牲法治去成就一個唔快得幾多嘅高鐵，值得咩？正如好多普羅市民一樣，Tina對太高深嘅法律問題唔太想深究，既然800億都畀咗，如果無一地兩檢會唔會好麻煩？係唔係會影響兩地旅客以及海外旅客使用？既然高鐵起好咗，點解唔實事求是呢？