【晴報專訊】張松枝在無綫曾參演超過100部劇集，亦正亦邪的演出令人印象難忘。12年離巢後，他轉投其他平台拍劇、拍電影，發展不俗，可惜遇上疫情，即時手停口停，他慨嘆做藝人難以轉行，幸好古天樂經常開戲，令一眾同業有工開。

張松枝在電影《犯罪現場》與古天樂（左二）合作。

　　時光倒流到1983年，當年16歲的張松枝在石澳被星探發掘入行，他曾拍攝過千個MV，跟金城武、陳慧琳合作，更是寶麗金《碟聖》系列御用男主角之一，有「卡拉OK王子」之稱，「當時卡拉OK興起，好需要我哋呢啲靚仔喺度嘅！」後來卡拉OK開始式微，適逢無綫開設經理人部門，張松枝獲無綫簽為旗下藝員，入讀94年第七期藝員訓練班，展開拍劇生涯。「嗰陣時好多人想入TVB做演員，係一個榮耀，我都有少少咁嘅心態，既然入到去喇，咪盡力試下囉！」

當年張松枝（左）與金城武合作拍MV，俊俏外貌並不輸蝕。(網上截圖)

初入行成「卡拉OK王子」

張松枝在《茶是故鄉濃》壞事做盡，令觀眾咬牙切齒。(網上截圖)

　　拍劇初期，張松枝演過不少正直角色，當中《離島特警》的「沈天祐」一角，令觀眾印象深刻。「到依家仲有人叫我『天祐』，可能我喺劇入面死得特別慘，套劇出街後，監製劉仕裕見到我做得幾好，於是搵我拍《茶是故鄉濃》，但叫我做反派，我又覺得幾特別喎，因為我一直都做好多正直嘅角色，要做好多功課先至入戲。」在無綫經歷18年光陰，他有感事業停滯不前而離巢。「當時王維基開咗HKTV（香港電視），想嘗試新公司、新製作…唔得咪再返嚟囉，唔試驚幾年後會後悔。加上結咗婚又有小朋友，開支比較大，出面嘅人工可能比較照顧到家庭，所以選擇離開TVB。」

讚ViuTV靈活性大

　　及後，HKTV不獲政府發牌，張松枝坦言曾感到徬徨，不過這段日子令他看透不少，「呢個世界唔係你話要，人哋就畀到你，耶穌話齋，呢度門閂咗，佢會開番度窗俾你，我都相信依家係咁樣，好彩佢真係開度窗畀我，畀我喺另一方面發展。」他轉投電影界發展，並為ViuTV拍《黑市》、《二月廿九》、《太平紋身店》等劇集。比較兩間電視台，張松枝說︰「TVB有既定程序，要變都唔會變太多；ViuTV嘅靈活性大，有新嘅嘢就會去試，無論劇集、綜藝節目，唔係一般電視台睇到嘅風格。」他指曾志偉出任無綫高層後必定有改革，口味將更迎合後生一輩。重回娘家？張松枝說︰「好難講，老闆、高層轉咗人，如果無綫仲用到我，大家咪傾下方向啱唔啱，但依家公司有咁多演員，仲需唔需要我哋呢班咁舊嘅演員呢？」

　　受疫情影響，張松枝不少電視、電影工作都剎停，他只好靜待工作機會，「依家好難去番兩年前嘅蓬勃環境，收入梗係有影響，盡量慳啲，依家仲有少少工作，客串性質嘅劇集，忍住先。」想過轉行？他一臉認真地說︰「唔做藝員，都幾難搵嘢做，做咗咁多年，你想接觸出面嘅工作，來來去去好似得保險、地產，仲可以做啲咩呢？我有諗過返內地做演員，但始終我有家庭，所以無行呢一步，留喺香港。好彩有古天樂先生，多咗電影開拍，又有ViuTV劇集拍下，仲可以生存到。」