疫情下自製佳節氣氛 陳豪全家布置巨型聖誕樹

　　【晴報專訊】明天是普天同慶的聖誕節，港人受疫情籠罩足足一年，既然應留在家中度過，就不如暫且放低鬱悶，自我製造節日氣氛，輕鬆一下吧！住家男人陳豪為仔女花心思移動家中擺設，加上年年必備的巨型聖誕樹，留在屋企也有新鮮感；港姐冠軍謝嘉怡首度在港過節，雖然媽媽在外國，但她已買定禮物，相當孝順。

陳豪與陳茵媺每年都會與三個仔女布置家居，充滿聖誕氣氛。

　　陳豪非常重視家庭生活，他笑言過往每年聖誕，都會與太太陳茵媺（Aimee）及三個仔女回加拿大度過白色佳節，今年未能成行，只能留港過節：「每年聖誕節，屋企一定放一棵巨型聖誕樹，我最鍾意同小朋友一齊布置聖誕樹，或者擺啲燈飾，又可以播啲有聖誕氣氛嘅音樂，再買定幾份禮物畀小朋友。至於聖誕大餐，一定係Aimee準備，其實我煮嘢食都叻，不過Aimee梗係仲勁啦！」

陳豪往年會全家返加拿大過白色聖誕。

　　疫情所限，一家人經常留在家中「你眼望我眼」，陳豪坦言在安排節目方面大傷腦筋。「之前試過全家喺屋企『露營』，其實諗得出嚟嘅都盡量做，我甚至搬埋張枱入間房，總之要將屋企擺設搞到同平時唔一樣，仔女已經好開心。」

謝嘉怡寄聖誕禮物返蘇格蘭

謝嘉怡逐漸適應香港生活。（IG圖片）

　　應屆港姐冠軍謝嘉怡（Lisa）首度在香港過聖誕節，她坦言因疫情關係，未能回家鄉蘇格蘭陪媽媽，難免有點失望。她說：「我最鍾意就係聖誕節，除咗氣氛好，亦係全家聚埋一齊嘅日子。媽咪有五個兄弟姊妹，爹哋就有十個兄弟姊妹，所以每年聖誕同農曆新年都好熱鬧。最記得喺蘇格蘭過聖誕，每朝起身一定會食雪糕，同埋睇聖誕電影，圍埋一齊好開心。」Lisa已買定聖誕禮物，寄回蘇格蘭給媽咪及其他親友，十分有心。