20/09/2012
2012萬聖節 搞鬼科技好盞鬼
萬聖節哈囉喂又嚟啦!又到香港兩大主題樂園搞鬼鬥法的時候!海洋公園的鬼屋已升級到5D,走上科技不歸路,沿路見到骷髏頭兜口兜面撞過來。又可做摩登道士,動一動眼睛將治鬼靈符貼住殭屍。
但迪士尼樂園死都唔放過你,搵殭屍大戰人狼,牠們可在魔鏡裏現身,樂園仲搞App俾大家加入殭屍和狼人的世紀大戰。
平日「卒」智能手機已「卒」到手軟,現在更加搞到鬼咁唔得閒!
海洋公園:5D 鬼屋地獄路
大家唔好羨慕我可以到海洋公園殺入鬼屋先玩為快,太早去,反而只可體驗2間鬼屋,其餘6間都未ready,搵鬼睬你咩!
戴副立體眼鏡。呀!!!!! 忽然有隻鬼從牆裏走出來!
我未落過地獄,但「5D地獄不歸路」一開始就係唔准拍照靈堂,反而令人最心寒,太逼真了。之後就有兩位道士遞個立體眼鏡俾你,一戴上,大家都好似變咗盲公陳咁。其實,人類最搞鬼,5D地獄用本地研發的CAVE 0.5立體投影系統科技,利用了兩部3D立體投影機,讓人走在立體的鬼世界,再配合嗅覺及現場鬼怪的互動驚嚇。體驗話我知,忽然你會見到骷髏骨頭飛到埋身。落到18層地獄,又點少得挖眼和勾脷筋,忽然有團友大叫:「誰噴口水?」哪有人噴口水?只係花灑輕輕噴了幾下咁啫!話說回來,我從來無聞到怪異的味。
都話唔飲你碗孟婆湯,要回家飲呀媽煲的老火湯。
忽然又有個異形從貼滿靈符的牆上伸出來,其實,最嚇人的不是科技製造出來所謂驚嚇效果,而係忽然在角落頭走個人唔似人,鬼唔似鬼的非人非鬼,嘩一聲,來嚇你。有個阿婆遞碗湯過來,叫你飲孟婆湯,我們當然無人飲湯,大家都係等收工回家飲阿媽煲嘅老火湯。
做個摩登道士
古墓凶靈最重要的古墓都未開,真係古墓空零。
之後去「古墓凶靈」, 據講要在多點觸控桌上一同尋找虛擬魔法石,及發掘圖騰後把石門打開,就可入墓尋寶。但搵到門路都無用,原來當日古墓未ready。唓!空驚喜一場!一心來被鬼嚇,卻變成被鬼玩。另外6間鬼屋,據講有「鬼魅冥婚大殿」、「全院『嚇』滿」、「黑暗末世紀」、「香港靈異禁區」和「末日巨星瘋狂匯」。鬼屋一直是海洋公園的招牌搞鬼玩意,非常受歡迎,在本月底推出App ,遊客可查閱各鬼屋的輪候時間,資料每15分鐘更新一次。
將視線追住殭屍,自然會出現一道治鬼靈符貼殭屍置於死地。
最後,大家走去玩「鬼眼滅魔門」遊戲,似電話亭咁大的Game Booth,裏面放有一部電視,setting好簡單,但這個遊戲的賣點,原來是全球首個引入醫療界的技術,利用眼球追蹤鬼怪。當你望實畫面上的殭屍出來,你的視線追住隻殭屍,自然會有治鬼靈符出現,仲貼住殭屍,佢game over。但係有好多隻殭屍出現,你要手快囉!都係嗰句,人比鬼怪更恐怖,心魔比鬼怪更難降伏。去除心魔,就無有怕。
十月大潮聖
日期:9月21-23日、28-30日;10月1、 5-7、12-14、 18-22、25-28日及31日。
時間:5:30pm-12mn
門票:哈囉喂「輕量級」門票(不設鬼屋入場)成人$180起、小童$90起;至尊門票(夜場及無限次利用快線入口)成人$480起、小童$240。夜間門票:成人$224起、小童$112起。
網址:www.halloweenbash.com.hk(可在網上訂票)
迪士尼樂園:魔鏡魔鏡鬼現形
在美國小鎮大街,一入夜,狼人族和殭屍黨就出來正面交鋒。
今年迪士尼的黑色世界由殭屍和人狼擔當主角,仲有全新的「詭墳學院」推波助瀾。殭屍和人狼兩大魔黨透過「魔鏡」和智能手機App「收o靚」增加自己的黑色勢力,而學院以非常鬼怪手法為兩大魔黨培訓黑色新世代。見到樂園的人玩得咁開心,就知原來墮入黑色力量真係好鬼易。
詭墳學院的外形陰森,你夠膽就入去啦。
在魔鏡拿著AR Tee照一照,殭屍即現形。
原本以為走入商店買東西,最多都是荷包出血,原來仲會俾人狼和殭屍征服。T-shirt是AR Tee,拿到鏡前度一度身,那塊「黑色世界魔鏡」,正好跟AR Tee搭上陣線,不久,有牙的殭屍就在鏡前出現;去拿另一件,兇惡的人狼又現形。鬼怪可以咁無孔不入,係運用「擴張現實」Augmented Reality (AR)進駐到黑色世界魔境,而人狼和殭屍就一早潛藏在AR Tee裏面,只要遇上魔鏡,它們就現形。它們也不放過小朋友,童裝的特別版米奇系列,可能有大大小小的南瓜仔現形,造型可愛,總算有小小良心。
在火箭餐廳外的魔鏡照相機,它更將靚女團友變成殭屍,最後當然拍下照片。
今年「整鬼化妝間」推出全新的半妝,每位$70,需時10-15分鐘。
在明日世界火箭餐廳外的 「整鬼化妝間」,只要你是「奇妙處處通」會員,在那塊鏡旁擦一擦會員卡,在鏡前拿著AR Tee,不久現出鬼怪,會拍下變成人狼或殭屍的靚樣,那張相片可於「奇妙處處通」專頁下載。
鬼怪力量擴散
別以為在樂園跟人狼或殭屍打完交道就可以拍拍屁股走人。你買下的AR Tee,回到屋企也一樣可以現形,只要下載相關的程式,就可在家中透過電腦的視訊攝影鏡頭,向親人好友展示你AR的鬼怪模樣。另外由今日(9月20日)開始,於iPhone App Store或Google Play Store下載,「黑色聯盟戰」App,便可隨時連線作戰。
學院將人變鬼
圖書館管理員肥嬸成日叫我哋唔好嘈,其實最嘈係佢,Shut up !
我們唔係魔界高材生的材料,但係都被人推入去「詭墳學院」,一入到去,就見到個陰森的班房,枱枱凳凳全部都識得「郁」……黑板前,站著一個好似小丑的人,佢個嘴被人用針線縫埋,好恐怖好可憐,再看黑板上寫滿的字,內容係:我唔會在課堂上傾偈。只係傾偈,使唔使縫住別人的嘴?之後,我們去圖書館,那裏掛住個Silence的牌,圖書館管理員肥嬸卻不停大力拍枱,叫我們收聲,她擺明係老屈。我們沿著陰森的路走,來到體操室,見到一個假人扮真人和一個真人扮假人在玩體操,氣氛恐怖,個真人成日講同一句話:「你哋唔好留低我……」聲音淒厲,他可能訓練得好辛苦,但又苦無機會逃出來。究竟係乜鬼學院,搞到學生人唔似人鬼唔似鬼?我們最後投懷殭屍和人狼的懷抱,走到美國小鎮大街,看殭屍黨和狼人族正面交鋒。其實萬聖節呢啲節日,笑住嚟驚係最好玩。
2012 迪士尼黑色世界
日期:10 月4 - 31日
夜間門票:3歲以上 $259。日期為10 月4-7、11-14、18、21、28及31日。6pm-11pm 入園。
樂園門票:1日票$399、3-11歲$285、65歲或以上$100。2日票分別$499、$355、$170(7日內任何2天)。星期四夜間通行證$260。
(撰文、攝影:周翠玲)
轉載自香港經濟日報
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇