全球疫情開始有緩解跡象，世界各地都傾緊旅遊氣泡，又或者講緊打邊隻疫苗；點知突如其來３月初印度疫情突然失控，4月25日更新增感染人數逾35萬人，令全球嘩然。究竟印度發生乜事咁大鑊？而印度大爆發又會唔會令到全球再次進入閉關狀態呢？

 (iStock圖片)

從「雙重突變」到「三重突變」，或騙過核酸測試

　　截至今日，印度累積感染人數達1700萬人，康復人數有1410萬人，死亡人數有19.5萬人。係去年6月起印度曾經有一波小爆發，直到去年9月達頂峰，當時每日新增感染人數逾9.7萬，之後慢慢回落。直到今年3月起，感染人數再次直線飆升，去到4月25日止，新增感染人數達35.45萬人，情況令人關注。

　　歸根究底，目前印度有兩種病毒株施虐，包括英國變異病毒株「B.1.1.7」及印度本土變異病毒株「B.1.617」。值得關注係，印度病毒株屬於「三重突變」，恐怖之處在於部分核酸檢測未必檢查得出，而且新增患者仲會出現腹瀉、意識模糊以及口鼻流血情況。先前印度發現「雙重突變」病毒株，係會令病毒傳染性增加，而目前呢種「三重突變」好大機會係由「雙重突變」演化而來，專家認為疫苗對其預防性仍係未知之數。

氧氣筒呼吸機全告吉，而家捐疫苗仲有無用？

  (iStock圖片)

　　印度出現大爆發，除咗雙病毒株侵襲之外，另一原因係當地治療器材不足，例如氧氣筒、呼吸機等等，當地醫療系統已經面臨崩潰情況；而火葬場因為不敷應用，遺體甚至要就地火化，令街上出現「當街焚屍」嘅情況，猶如人間煉獄。外國通訊社指，首都新德里每4分鐘就有一個人死於新冠肺炎，多間醫院都要係門口臨時設立火葬場，就地火化死者。

　　世界各國基於人道主義，都開始往印度輸送物資，好似法國總統早前宣布幾日內會向印度提供「氧氣支援」；美國將會向印度運送製造新冠疫苗材料及設備，同時美國傳染病研究院考慮向印度輸送阿斯利康疫苗；英、德兩國都會向印度輸送治療器材及提供緊急援助。不過，而家開始打疫苗仲有無用呢？目前印度官方數據顯示，感染率為1.16%，據專家估計要達至群體免疫率70%仍需要幾十年時間，甚至要經歷百萬人死亡，所以印度而家開始接種疫苗有幾大成效，都仍然未知之數。

多國禁印度航班，富豪搶貴機票加倍「出逃」

  (iStock圖片)

　　印度疫情爆發，同樣亦令各國開始斷航，令當地成為「圍城」，而趕在「落閘」前逃出圍城就成為有錢人專利。由於印度同阿聯酋交往頻繁，上周五（23日）宣布自周日(25日)起停止印度航班入境，令孟買飛往杜拜嘅單程機票急飆至7800港元，係平時嘅十倍；私人飛機於25日飛去杜拜嘅12個航班，亦全部爆滿。

　　中國駐印度使館提醒，當地公民注意遵守防疫措施，無咩事都唔好出行，而中印兩地航空，自去年11月停駛至今都仍為恢復；而伊朗都宣布，昨日（25日）暫停與印度及巴基斯坦所有航班。睇怕呢次印度「圍城」情況嚴重，香港人都唔可以掉以輕心，必須「洗手！洗手！洗手！」，做好防疫措施，因為目前低感染率得來不易㗎！

撰文:李皆穎