唔講唔覺，新冠病毒（COVID-19）都已經發生大半年，到今日已經有2700幾萬人感染，死亡人數已經接近90萬人，幾時可以停止仍然未知之數，而世衛總幹事譚德賽就警告，全世界需要為下一波大流行疾病做好準備。

（Shutterstock圖片）

譚德賽預計新冠病毒唔會係最後一次大流行疾病

（Shutterstock圖片）

　　譚德賽喺日內瓦主持疫情記者會，會上佢同大家警告，疫症爆發同大流行其實無可避免，所以呢次新冠病毒並唔會係全球最後一次流行病，大家應該做好準備：

　　「歷史話畀我哋知，疫情爆發同流行病係生活的現實，所以當下次一流行病來臨時，全球必須要準備好，要比今次做得更好！」

　　呢次疫情已經死近90萬人，美國總統侵侵（特朗普）就認為世衛呢次辦事不力同太親近中國，所以退出世衛兼連會費都唔找數。世衛嘅出現本身就係預防疾病大流行，不過而家似乎自己都好頭痕。

暗批美國無加入疫苗開發，譚德賽指民族主義拖長疫情

（Shutterstock圖片）

　　其實呢次會議已經開咗幾日啦，會上除咗互相交流情報之外，仲包括呼籲更多國家加入世衛與GAVI（全球疫苗免疫聯盟）共同領導的國際疫苗分配計劃「COVAX」，而譚德賽梗係要酸下啲無加入嘅人啦：

　　「疫苗民族主義就只會拖慢抗疫工作，所以希望各國公平使用疫苗，呢次要多謝德國、日本、挪威１７０個等國家入呢個計劃，希望未加入嘅國家都係本月１８日前加入啦！」

　　佢呢次就無講明邊個係「未加入計劃」同「疫苗民族主義」，不過明眼人都睇得出佢講緊嘅係美國。

世衛：人畜共通傳染病機會提高

（Shutterstock圖片）

　　其實譚德賽咁樣警告並唔係無原因，因為有專家認為，人類大量砍伐森林，令到野生動物被迫進入人類活動範圍，就算一啲病毒本身係唔會傳染畀人類，但由於接觸多咗而令到病毒「變異」，所以人畜共通感染機會大增。

　　據目前資料顯示，每年都有10億病例同過百萬死亡病例，都同動物嘅疾病有關，所以政府必須派遣生物學家、動物學家觀察，喺呢啲動物疾病演變成全球大流行之前就將佢殲滅，防患於未然！

撰文：李皆穎