珍惜「新界佬」

　　朱凱廸以票王（佢唔鍾意人哋咁叫佢）姿態，當選立法會議員後，掀起一場新界風暴，新界各種問題，一次過擺晒上枱面討論，好多「新界佬」嘅名字，每日都出現喺新聞報道裏面，梁福元、侯志強、劉業強、曾樹和等等，我諗除咗發叔病重嗰排之外，都好少機會聽到佢哋日日都一齊上電視講嘢。 

　　嗱我覺得，香港人真係要珍惜呢班「新界佬」，特別係老啲嗰一輩，因為佢哋可能係現今政界最純真、最直接嘅一群人（喺枱面上），一齊諗吓佢哋有幾多可愛之處........ 

　　首先，佢哋坦白直率，有嗰句講嗰句，梁福元大方承認「官商鄉唔係勾結，係合作，講埋黑都唔緊要，係合作」，第二日佢上另一個節目，就話自己當時咁講係因為唔知主持人所講嘅「黑」係講緊咩，可能佢係諗緊官商鄉同鄉郊隻唐狗「小黑」合作，呢種純潔，比起好多虛偽嘅港島人嚟得更加可親，例如嗰啲去完中聯辦唔認嘅人。 

　　第二，佢哋講得出做得到，做唔到都起碼係威係勢先。1999年，上水石湖新村收地事件，村民示範咩叫拼死捍衛家園，「真．勇武」，佢哋對住一整排full gear防暴警察，佢哋唔懼怕，攞齊架生，有人攞出開山刀劈落去防暴盾上面（不過劈唔斷），有人攞出石油氣罐想燃點，同警察同歸於盡（不過俾防暴警察踢走咗個罐）。最後佢哋輸咗呢場戰役，地，最終被收回，不過雖敗猶榮，為香港人勇武抗爭做咗一個最佳示範。菜園村抗爭對佢哋嚟講真係相形見絀。

　　多年嚟，佢哋都擺出一副硬朗形象，除咗拆遷問題外，五年前政府想整頓新界僭建問題，以至舊年套丁案宣判後，佢哋強硬回應，同政府講明套丁係經官府承認嘅合法行為。有新界佬更加揚言要「流血抗爭」，曾經有人話要圍政總放炸彈。如果明知自己做緊嘢係犯法，就「公民抗命」—靜靜雞繼續做，如果有人重想搞我？落閘，放狗！鄉黑合作時間到，小黑，go，bark！

　　你就睇到，當有人嘗試觸碰佢哋權益嘅時候，就會義無反顧咁樣去回應。朱凱廸試圖倡議民主改革鄉議局，改變新界土地運用嘅潛規則，可能會傷害新界佬嘅利益，佢梗係唔會就咁算數啦，學侯志強話齋，教仔咋嘛，佢冇斬你你咪應該劏雞還神，為咗每一日都重生存喺世上而要向佢哋感恩戴德，又報警又報傳媒，對於新界人嚟講實在太唔俾面啦！ 

　　新界佬最值得一尊重嘅地方，就係佢哋團結一致，一有咩事，一呼百應，團結過而家一盤散沙嘅泛民主派，甚至團結過各懷鬼胎嘅建制派。有咩恩怨？閂埋門咪又係兄弟囉，搵一個人開個記招，然後另一個call齊手下踩場，一齊拆掂佢！

　　對於新界佬嚟講，佢哋好簡單，人人生而平等，一出世就攞住丁權嘅佢哋更加平等，如果佢伯爺本身就係地主，佢個世界直情係最平等添，最緊要有錢賺，丁權、丁地、丁屋，對佢哋嚟講就係唾手可得嘅商品，當朱凱廸帶住大衛嘅身影，去抗擊呢隻大哥利亞嘅時候，你選擇沉默，可能就係延續呢種不公嘅幫兇。 

　　而呢一個專欄唔少親愛嘅讀者，你哋最親愛嘅梁特首，喺2012年參與新界江湖人士嘅小桃園飯局，變相承認江湖人士喺佢嘅管治之下有地位，今日面對朱凱廸「官商鄉黑」勾結嘅指控，以至黑勢力似有不能受控嘅趨勢，點樣做show反黑都冇用。 

　　從丁權衍生出嚟嘅新界特權階級，同外判演化出嚟嘅怪獸領展、以至公用事業變身地產商嘅港鐵，三個霸權拱照香港，香港人，你們真幸福。