一個理想嘅議會，議員會喺裡面議事、制定法例、監察政府、睇住盤數，防止政府亂咁用納稅人嘅錢。一個理想嘅選舉論壇，就係呢個理想議會嘅門檻，除咗考你辯才，仲考你熟唔熟書，對自己主理嘅政策範疇係咪一個小專家，對自己嘅理念有幾堅持，然後同對手較量，作為游離選民考慮投唔投俾自己嘅測試賽。

　　話到明「理想」，即係宜家暫時都未做到咁樣，坦白講句，以上可能只係大家一直以嚟嘅「幻想」。我睇完今屆各大大小小嘅競選論壇，我就知道，呢種「理想」嘅議會生態，同「Pokémon Go有得捉超夢夢」一樣，只係會喺傳說中出現。我已經接受咗，睇完一個個半鐘嘅選舉論壇，喺吵鬧、疊聲、神經錯亂嘅表演之中結束，而呢個半鐘係一樣嘢都冇得袋落袋，而且更加對自己想投邊個人更加疑惑。不過疑惑唔緊要，娛樂性豐富就得啦。

　　我哋會見到一個村姑打扮嘅候選人，口窒窒咁樣鬧泛民鬧港獨，再用陰聲細氣話你聽「我撐ＣＹ連任特首！」當每個保皇派都唔敢答呢條問題嘅時候，佢撇脫咁樣支持。朋友們都會慨嘆好難揀，因為有好多極品，有人會為私怨不停狙擊另一名候選人，而且不停喺論壇向佢怒吼，有人就好堅持要求將包二奶刑事化，爭取多年，未竟全功。 有民主派不停攻擊本土新人，亦有本土新人英文都未聽清楚就塞說話入人哋把口。

　　但以上嘅內容，係喺多個論壇都重複出現，當你想睇完一個論壇，想睇埋其他論壇去判斷候選人嘅質素，你會發現，八月頭同八月尾嘅論壇，講嘅都係同一番說話，攻擊其他人嘅亦係同一番措詞，絕大部分都冇變化，或者冇進步，究竟係時間太緊逼，令大家冇得回氣，定係大家都已經疊埋心水泥漿爛鬥？　

　　以上嘅掙扎，對於我呢一類非保皇陣營而言感受最深，因為說穿了，今時今日嘅選舉論壇，就係一個失效議會嘅縮影。呢幾年立法會經歷咗幾次重要抗爭，新界東北撥款、高鐵追加撥款、雨傘運動、政改，等等等等，睇到嘅係，政府對於任何唔係保皇黨提出嘅嘢，都採取消極同忽略態度，泛民提出嘅修正案，即使冇拉布嘅性質，絕大部分都未能通過，議會完全就好似自絕於溝通、妥協呢兩個詞語，但坊間嘅印象就係好亂、好亂同好亂。

　　喺呢堆抗爭過後，我會期望本土派新人輩出，可以力爭話語權，但係經歷咗選管會嘅無理篩選，將梁天琦等多人拒諸門外，睇完堆論壇，連網上嘅本土派支持者都認同，唔少候選人嘅論政表現好薄弱，喺香港點自給自足 、入到議會可以點樣有效抗爭嘅論述都未度掂，我會質疑係咪所託非人？本土派只係有梁天琦可以令大家好放心投佢一票？佢哋入到議會可以發揮嘅功效係咩呢？定係只係好似部分本土派所言，係為咗爭取資源同時間，俾其他本土派喺議會外做想做嘅嘢？

　　論述能力較好嘅，就多數係競逐連任嘅議員，但係傳統政黨嘅包袱仍在，社運圈子嘅「進步民主派」就面對一個死結，既然呢幾年嘅抗爭已經開咗個頭，返唔到去溝通之路，但抗爭又走入樽頸，佢哋可以點樣憑佢哋嘅論述突破立法會無效呢個枷鎖？

　　解答到以上疑問嘅候選人，可以得到我卑微嘅一票，但遺憾嘅係，雖然今屆參選名單係歷屆之多，仍然未有人達到我自己心入面呢個門檻，而距離選舉，只係剩返11日。