27/07/2016
香港到處「小智」卻沒一人可成為「任天堂」
2016年7月25日,係我哋呢代人(所謂第四代至第五代香港人,亦即係八十後九十後)一個集體回憶復興嘅重要日子,講緊係真係集體行動,集體上街,為嘅就係「日夜鍛鍊去取勝」。細細個攞住部黑白Gameboy插帶玩,帶住小智,一隻一隻咁樣對戰、捕捉、入道館贏徽章、打四大天王、捉超夢夢,一幕幕重係歷歷在目。
Niantic公司同任天堂合作,將寵物小精靈(官方中譯:精靈寶可夢,真係好難聽好難聽呀)動畫衍生出擴增實境(AR, Augmented Reality)手機遊戲Pokémon Go,完全打破咗大家對手機遊戲嘅想像。科技真會係先進到有一日我哋自己真人都可以喺現實生活中,成為訓練員。
呢兩日通街男男女女,唔單止廿幾歲嘅後生仔女,就連唔少中年人都上埋癮,一齊捉埋一份,好多空曠地方夜晚都人頭湧湧,仿彿大家提早慶中秋一樣。喺日頭公園裡面,由原本係老年人休閒坐低抖涼捉棋,變成後生仔坐晒喺捉寵,追雀仔或者追蝙蝠。喺屯門同天水圍嘅公園,有人更加形容係成功「光復」,原本跳大媽舞嘅人唔見晒,形成「年青人愛落公園」嘅新常態。
各地正苦咁多年嚟,落咗幾多功夫,希望叫啲宅男宅女出多啲街見識吓,到頭來,都係傳統智慧最有效,「解鈴還需繫鈴人」,解決「宅」問題的,竟然就是「繫鈴人」電子遊戲。我諗無論係遊戲廠商,還是動畫原作者都諗唔到會帶嚟呢個效果。
更加出人意表嘅效果係,有唔少玩家都反映,呢隻遊戲喺傳媒大力催谷同埋宣傳之下,達致家中老幼一齊玩,連家庭和睦都達成埋,社會一片和諧,咩確認書、林榮基、世界周地恐襲大意外,全部都拋諸腦後,捉唔到比卡超,俾阿媽鬧重大鑊呀!
不過,政府就未必好鍾意呢隻遊戲,一來會令條街好多人,佔領陰霾不散。另外就係遊戲入面嘅Pokestop其實都係沿用返同公司一隻已經出咗四年嘅同款遊戲Ingress嘅標記站,各站嘅資訊由用家自訂,例如佔領時期夏慤道行人路有一個站,標記咗係「連儂牆」,工聯會總部被標註為「出賣工人嘅聯會」,抽水味濃,大家亦都好期待西環中聯辦外面係咪有護主犬、禮賓府又係咪有龍蝦同紅唇蛙呢?
喺呢一刻,我會問一個問題,號稱人均智商排世界第一嘅香港,出唔出到類似嘅遊戲?首先,我見到創科局局長楊偉雄,喺接受傳媒訪問時,話創科局成立八個月以嚟,特別強調爭取到立法會通過向創新及科技基金撥款二十億,而坊間都好多人覺得呢個算係重要政績,仰賴政府由上而下向創科企業餵食。
跟住,就見到出咗一隻風行全城嘅遊戲時,有為數不少一向務實嘅香港人嗤之以鼻,棒打出頭鳥,有唔少人戴住有色眼鏡去睇一切潮流,成為道德方丈,捉住部分喺外國懷疑因為呢隻遊戲造成嘅意外去批評,如果係咁,手提電話本身就係一件分心神器,大家應該一早就禁咗佢。 有基督徒甚至乎喺whatsapp廣傳話呢隻遊戲係宣揚邪教嘅遊戲,呼籲抵制。
抱住呢種心態,可能連山海經GO都未必出到。或許係大家都慣咗做小智,追隨小剛步伐,但要走出comfort zone,打完四大天王再展一返事業,做另一個任天堂呢?冇乜人做到。其實只要肯試、肯失敗,根本唔需要咩創科基金,創科從來都唔應該由政府牽住鼻子走。只係呢種陣痛,即使你肯承受,香港社會都未必肯。
所以話,香港人好簡單架咋,緊守小智崗位,正苦高官如果想有高民望,或者提升返跌破兩成嘅支持率,就應該攞部電話出嚟,同大家分享自己部手機MON,捉到啲咩勁嘅POKEMON,例如CP值過500嘅護主犬,下期民望肯定好似個game入面啲level咁樣爆升。
但叫得做正苦,佢暫時只會提醒你,現實世界嘅法律,同樣適用於網絡世界…完。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票