《鱼缸博客》美股临到第一季最后一个交易日，道指同标普就拗升返些少，但都扭转唔到三
大指数全月要跌嘅事实。侵侵被大批侵粉拥护执政，大家都期望佢可以为花旗国带来变革，可惜
过了几个月，大家只係见到侵侵如同唐吉诃德大战风车嘅拙劣演出，内政乱成一锅粥，外交变成
大断交，所有争端都用关税处理，最惊问题无解决，反而导致国内通胀节节高，咁就真係荒诞啦
。
　
　　一直吹嘘自己交友广阔嘅侵侵，豪言要喺上任一日内解决俄乌问题，结果先喺公开场合同泽
连斯基争执，后又俾普京大帝请食柠檬，两边不是人，如果事件处理唔好，什至削弱美国喺全球
势力，就将会係侵侵第二个任期嘅最大败笔！
　
　　话说侵侵好不容易逼到乌克兰总统泽连斯基同意３０日停火协议，以为战事可以迎来转机，
点知另一边厢普京拒绝停火，令自称同普京好熟嘅侵侵落唔到台，媒体直头形容特朗普喺停火谈
判上对普京係「非常愤怒」。其实俄罗斯喺俄乌战争上付出了太多代价，普京为了维护自己嘅强
人形象，除非有足够利益，否则就算战斗到最后一兵一卒，都唔会示弱，如果侵侵真係了解自己
嘅对手，就唔会作出咁鲁莽嘅判断啦。
　
　　而特朗普「非常愤怒」之后，就威胁普京如果不同意停火，就会对俄罗斯石油买家征收
２５％到５０％嘅连带关税，以弥补佢嘅损失。呢一句劈落嚟就即时令到纽油挤高了３％重上
７０美元之上，俄罗斯嘅经济命脉离唔开油气资源，但喺被欧美经济制裁多年后，早就搵到一条
勉强存活嘅生路，石油再被收多几成关税，又算得咩呢？
　
　　特朗普一心盘算如果可以促成俄乌停火，一方面油价可以下降，商业成本下降同时令美国通
胀风险减低，另一方面又可以攞到乌克兰稀土开采权，係一石几鸟嘅做法，可惜佢唔记得外交唔
係做生意，唔係个个都係讲钱，施展「谈判艺术」嘅前提，係对方愿意坐上谈判席。
　
《编者按》本栏搜罗即市传闻，惟消息未经证实，《经济通》亦不保证内容之准确性。