11/07/2024 16:47
《小傳日記》京滬輪流推無人駕駛,「L3」「L4」係乜嚟?
《小傳日記》炒咗AI一輪,到近期終於輪到無人駕駛概念翻兜,實際上技術一路都提升緊,不過睇吓幾時被孖屐瞅到,咁啱呢期無材料就輪到無人駕駛概念。 近期神州政策上都開始偏向注意自動駕駛,先係北京市政府喺上月底發布徵求意見稿推進L3級以上自動駕駛汽車用於市內公共交通用途,再到今日有消息提到上海發改委都要求推進自動駕駛應用,開展智能交通應用,有序開放新城智能網聯汽車應用等等。多地政策逐漸浮面,令孖屐都意識到係時候跟一跟呢個風。 北京同上海嘅政策消息都提到要推進L3級或以上自動駕駛應用,「L3級」實際上係國際汽車工程師學會(SAE)為自動駕駛先進程度劃分嘅級別,由「L0」至「L5」。「L0」係無自動,全人手控制;「L1」稱為「輔助駕駛」,主要都係由司機駕駛,但會加入個別智能系統輔助;「L2」稱為「部分自動駕駛」,司機可以開始放開舵盤,靠主動式巡航定速等等作自動駕駛,但司機都要監察路面情況;「L3」係「條件自動駕駛」,車輛可以做埋路面監察,但遇到狀況時系統執行預設指令前都會先經司機應答批准;「L4」係「高度自動駕駛」,除咗個別惡劣環境同天氣,否則司機可以完全唔使同系統交流都可以自動駕駛;最後「L5」就係任何情況都由系統百分百操作嘅「完全自動駕駛」。 目前北京同上海先後發布推進L3級應用,意味國產自動駕駛技術喺L3級別已經完全掌握,阿爺先會放心喺一線城市落實。所以大有可能目前L4級都已經八八九九,只係睇在坊間對於自動駕駛嘅信任程度,未來幾年內進一步推進L4應用應該唔難。 不過直到L4級,自動駕駛技術都未能夠完全掌控所有複雜環境,仍然要靠人類喺特別環境之中控制。呢一點就難,始終唔同城市嘅路都大大唔同,橫街窄巷猶如迷宮,好似香港如果要出現第一架喺路面行走嘅自動駕駛車一定仲有排,最起碼一批揸車搵食嘅一定會百般反對先,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票