《小傳日記》今日理想（０２０１５）第三季財報一出，大家都嚇一跳，原來佢哋因為利息收入同投資收益為負，蝕咗兩千幾萬人仔。回想之前上半年，理想汽車靠理財發咗達，喺利息收入及投資收益方面賺咗１４﹒３９億人仔。雖然經營業務蝕咗１﹒１６億人仔，但憑住理財收益，最終實現１６﹒９２億人仔嘅淨利潤。即係話令佢哋嘅淨利潤８５％係靠理財收益嚟補貼。理想上半年投資收益率接近１０％，投資收益仲高過巴菲特，真係不得不佩服！如果第三季度，理想可以實現上半年嘅投資收益，咁理想嘅淨利潤將達到４０億元人仔左右。　　車企中，靠理財嚟拉高淨利潤嘅，唔係得理想一間。你睇吉利（００１７５），佢哋減持子公司極光灣股權，賺咗７６﹒６億人仔，淨利潤即刻升到１０６億人仔。再講到賽力斯（滬：６０１１２７），佢哋上星期啱啱話會用１５０億人仔買啲低風險嘅理財產品。　　點解車企唔專心賣車，大搞投資呢？因為而家嘅車市真係唔易捱。瘋狂嘅價格戰真係壓到車企透唔到氣。對手為咗搶市場份額，成日減價促銷，搞到大家都唔敢加價，直接影響到毛利率，逼住車企要喺微薄嘅利潤中生存。宜家自動駕駛技術發展又咁快，逼住車企要使大筆錢去做研發。呢啲研發成本唔係小數目，動輒十億八億人仔。再加上車企有天然嘅投資優勢，車企嘅市場龐大，上游有供應商貸款，下游有汽車預付款，呢啲都令到車企手頭上有唔少現金流。喺第三季度，理想嘅經營現金流淨額達到１１０億人仔，帳面現金高達１０６５億人仔，即使扣除短期同長期借貸，淨現金都仲有９７７億人仔。呢筆錢如果只係擺喺度等佢貶值，不如用嚟理財，起碼可以幫到車企賺返啲收入。結果就係，理財嘅回報率有時仲高過賣車。　　大家都講笑，話賣車不如理財。雖然理財帶嚟嘅回報可以暫時穩住陣腳，但長遠嚟講，車企需要諗辦法點樣唔靠理財都可以盈利。要喺提升產品競爭力、優化成本結構同探索新市場上落功夫，先至可以真正喺呢個變幻莫測嘅市場中企穩陣腳。希望理想同其他車企可以搵到自己嘅創新出路，實現可持續發展！請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票