《小傳日記》近兩個星期係季績公布期，各大上市公司忙住公布最新季度業績。一般情況下，業績好股價就自然炒上，反之則跌。不過，近期有少少例外，業績好嗰啲，股價隨時倒跌，反而業績普普通通嗰啲，股價隨時飆升。當然，升跌總要搵藉口，例如業績好但預期第四季會轉差，又或者業績不好，但市場一早預咗衰，而家無咁衰，所以股價升得有道理之類，凡此種種。呢度就唔逐個講啦！　　　不過大市窄幅上落，個市悶悶哋，但就爆咗一隻焦點股票出嚟，講緊唔係啱啱出咗業績嘅小鵬汽車（０９８６８），亦唔係中移動（００９４１）有意收購嘅香港寬頻（０１３１０），而係名不經傳嘅ＳＰＲＯＣＯＭＭ（０１４０１）！所謂不鳴則已，一鳴驚人。今日成為跌幅榜榜首，股價最多蒸發９１％。收報１﹒５０銀，比噚日收市價１２﹒４６銀，跌８８％。　　　之所以跌咁多，原因係畀證監查，話公司２６名股東合共持有５﹒１７億股該公司股份。另有４７６０﹒４萬股該公司股份，雖然喺香港股東名冊中登記為香港中央結算（代理人）有限公司所持有，但並無結存於中央結算及交收系統。有關股權連同由該公司兩名大股東持有之３﹒４５億股，相當於該公司已發行股本之９１％。亦即係話，該公司實質只有９００２萬股係街貨，佔已發行股本之９％。　　　唔好以為暴升暴跌就一定係股仔，原來ＳＰＲＯＣＯＭＭ市值以噚日收市價計有成１２５億銀，所以算係大市值公司，而且今日成交都過億銀！就算公司而家跌足八成幾，但市值都有成十幾億銀。與其問呢間公司點解今日跌成咁，不如問下呢間公司做啲乜嘢業務先可以谷得起百億市值？　　　根據資料，ＳＰＲＯＣＯＭＭ係按ＯＤＭ基準從事研發、設計、製造及銷售手機及手機的印刷電路板組裝。主力都係賣低價手機，佔營業額約６４％，以市場區分，中國、印度、巴基斯坦三地佔公司總營業額９５﹒６％，筆者點入公司主頁，發現公司生產嘅手機有三款，其中兩款聽都未聽過，至於另外一款叫Ｎｏｋｉａ　Ｃ３，似乎係諾基亞發布嘅入門級智能電話，２０２０年發布嘅售價係６９９元人仔，不過時移世易，如今估計都已經被其他百元級手機取代咗生態位喇。　　　ＳＰＲＯＣＯＭＭ喺２０２３年做２８億人仔生意，賺得３２００萬人仔，而無論係營收定係利潤，２０２３年已經係過去四年中最標青嘅一年。咁就做到百億銀市值公司，市盈率高達３９０倍，真係有啲意外。如果係一家獨角獸，或其他具潛力嘅初創企業，高市盈率甚至未有錢賺，都仲有啲希望，但以一家做ＯＤＭ生意嘅企業來講，真係有啲不可思議。其實，公司２０１９年年尾上市，上市價０﹒５銀，股價頭三年變動不大，舊年大炒一輪股價最高上到４銀。今年再炒一鑊，股價最高去到１５﹒３銀，正式登上百億市值寶座。而家股價跌成咁，只可以講一句，「邊度來邊度去」，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

想要獨家投資理財Tips？即Like etnet 全新Facebook專頁► 立即讚好