《小傳日記》呢個幾星期孖屐搵到樣「穀子經濟」嚟炒，不外乎盲盒動漫ｉｔｅｍ、人物ＩＰ產品之類。不過無論有無呢個ｔｅｒｍ，泡泡瑪特（０９９９２）都已經全年升唔停，唔使概念都已經有麝自然香。　　　「穀子」個名取自英文「Ｇｏｏｄｓ」嘅日文譯音再譯做中文，因為動漫界集慣將動漫周邊產品稱為Ｇｏｏｄｓ，「穀子」由此得名。因為鍾意一套動漫而購買周邊商品，賺嘅就係情感消費嘅錢，穀子經濟主打「動之而情」，情緒上刺激人使錢，而後生嘅更容易為之而觸動，成為打破消費低谷嘅缺口，泡泡瑪特全年嘅逆市強勢表現正正就係反映情感消費嘅威力。　　　近呢年返上深圳，唔少商場入面都會見到多咗好多動漫周邊產品舖頭，賣ｆｉｇｕｒｅ、手辦、立牌等等，一嚟反映日本動漫嘅軟實力，亦反映做呢行係搵到錢。　　　不過只限大陸。今年尖沙咀廣道多咗一間Ａｎｉｍｅ　Ｔｏｋｙｏ，樓高三層佔地８萬呎，主營動漫周邊產品，好多熱門動漫ＩＰ產品應有盡有，號稱港版「秋葉原」！但開業半年，上個月已經關門大吉。網友就總結咗來也匆匆去也匆匆嘅原因，其中貨品種類少兼賣到貴一貴似乎就係死因之一。據傳三層共８萬呎舖位月租七球，但周邊產品同質性高好難賣得太貴，據講Ａｎｉｍｅ　Ｔｏｋｙｏ已經比出面賣得貴好多，但結果都係維唔到皮。　　　但相反本地「穀子」嘅集中營油麻地繼續暢旺，旺角信和中心同油麻地現時點喺呢半年內都仲係人迫人，某程度係反映緊消費習慣。上述兩大地點已經係本地「穀粉」嘅必去景點，而且「買穀」嘅方式通常都係網上預訂再貨到畀尾數攞貨，有心買某種ｉｔｅｍ嘅人已經一早訂貨，好似Ａｎｉｍｅ　Ｔｏｋｙｏ咁嘅穀店，要靠旺區帶動人流量嚟賺錢，已經失咗一批忠炒客，只可以做到街客，對於一啲未至於大熱嘅ＩＰ嘅周邊產品好有可能會無人問津，相信都係中後期Ａｎｉｍｅ　Ｔｏｋｙｏ只賣大熱ＩＰ產品嘅原因。　　　要喺香港搞得起「穀子經濟」其實唔容易，消費者一來比上面為少，二來香港人太習慣某種模式之後就唔會變，如果能夠成功改變消費模式，就可以贏到呢個穩定嘅收入來源，但分分鐘贏粒糖輸間廠，要去改變就已經要有唔少投入，唔夠實力好容易撐唔著。熟市兼有經濟實力係食到「穀子經濟」嘅基礎，其實近一年都有啲商場開始想造做大穀子概念，開咗啲動漫專區，但目前都係試緊，始終未見到好成功，相信都仲要花時間摸熟行情，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇