24/05/2024 11:48
《魚缸博客》股價連續3日衝擊1毫,中國鐵鈦想擺脫仙股行列?
《魚缸博客》近日港股顯著回調,藍籌股大致上跟隨大市下調。資金無嘢好買嘅時候,容易造就魚缸細價股趁機炒起。噚日就有隻細價股,個名同中國鐵塔(00788)只差一個字嘅中國蜀塔(08623)無端端爆升,最多曾升195﹒2%。雖然收市升幅收窄,但都有66﹒7%進帳。 今日暫時有東方匯財證券(08001)領跑,博客執筆時升緊45%,會唔會繼續爆上暫時未知,不過,交投疏落,炒味唔濃,未必可以同中國蜀塔噚日嘅表現相提並論。 又蜀塔,又鐵塔,搞到博客眼都花。無獨有偶,另一隻同中國鐵塔又係只差一個字嘅中國鐵鈦(00893)又跑咗出來,引起博客注意。中國鐵鈦暫時升幅溫和,呢刻升緊9﹒3%,今早更一度飆升三成,最多升至0﹒108銀,短暫時間脫離仙股行列。老實講,以細價股來講,升三成真係唔算誇張。但係,中國鐵鈦股價前日(22日)已經升咗一倍,盤中最多升183%。急升之後難免回吐,所以噚日都回調返兩成,但比起爆升前仍然升超過一半。 不過,中國鐵鈦唔似啲妖股咁,頻密搞配售或供股合股之類嘅小動作。公司營收亦相對地平穩,算係正經人家。雖然盈利飄忽不定,但過去3年總算有錢賺。公司股價喺2010年曾經高達5﹒5銀(除淨後),只係高峰過後,股價一直走下坡。近呢一年幾以來,更加位列「仙班」,成為名副其實嘅仙股。上周更創下自上市以來嘅新低--4仙半。不過,話曬都係一間做正經生意嘅企業,而家市值得兩億銀鬆啲;以每股帳面淨資產2毫8,股價9仙來計,市帳率只係0﹒29倍左右,真係有啲低估咗。 但係博客一向對啲仙股比較謹慎,除咗要做正經生意之外,仲要股價合心水先考慮。中國鐵鈦爆升之前,股價大致上維持在5仙至6仙區間,而家升到9仙,略嫌有啲貴。除非返到6仙至7仙附近,或者會考慮吓。(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情