《小傳日記》上個星期阿爺為香港送上同胞免稅額提升作為七一禮物，不過事後業界就嫌萬二銀係略為少咗啲，買個包都可能過咗，所以金行股都無乜反應。不過同行唔同命，過江龍老鋪黃金（０６１８１）上市第二個交易日仲有得升，今日再升夠一成，成交１﹒８億銀有多，仲多過藍籌周大福（０１９２９）。　　老鋪黃金上個禮拜五上半年壓軸上市，較招股價大升七成三收場，成交１１﹒６５億銀，仲高過集資額９億銀。老鋪黃金喺香港得一間分店喺海港城，喺上面就有總共２２間門市，最多係位於北京有九間。老鋪黃金主力銷售原創古法金飾，用古法工藝鑄造新派設計。入去官網一睇，見到老鋪黃金嘅出品比起本地金舖見到嘅，設計的確係比較精緻而且少見，而呢一點都係老鋪黃金喺神州跑出嘅原因。　　老鋪黃金七年前成立，以往如果要出產老鋪黃金出品咁嘅工藝，所花費嘅人力物力一定唔少，但老鋪黃金嘅擴張速度同成功，令到同行都要跟風，所以近幾年其實喺本地金行都會見到多咗好多新穎設計，並唔止於以往嘅龍鳳鈪同金豬牌。招股書提到，２０２０至２０２２年純利分別係１﹒１４億人仔、９４５３萬人仔以及４﹒１６億人仔，即係疫情期間都仲有錢賺。疫下賺錢不特止，以為古法工藝講求人力物力，但老鋪黃金２０２０至２０２２年嘅毛利率一直維持喺四成以上，分別係４３﹒１％、４１﹒２％以及４１﹒９％，比起本地金行股平均約兩成多足一倍，話畀孖屐知負財富效應下賣金都可以有錢賺。　　招股書又提到，集資淨額當中超過７３％用作擴展銷售網絡，希望未來幾年可以喺國內同海外開設新門店以促進品牌國際化。中企出海一向都係最大挑戰嘅一環，涉及高科技嘅處處受壓，低科技嘅零售業又要睇各地消費者受落程度。如今炒老鋪黃金，就係押注佢究竟喺海外市場得唔得，主打嘅中式古典風格贏唔贏到外國人嘅心。其實中式古典一向都有市場，如果老鋪黃金嘅市場推廣繼續成功，其實要跑出都大有可能，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票