01/03/2024 11:39
《魚缸博客》「切辣椒」本地地產股無著數,反而益咗中介美聯?
《魚缸博客》前日香江財爺公布最新一份《財政預算案》。一如市場預料,政府即日起撤銷額外印花稅、買家印花稅和新住宅印花稅。預算案公布後,一眾本地地產股齊齊升到嗨嗨哋,當中「四叔」(00012)最神勇,一度領漲7%,傲視同業,但尾段升幅收窄,尋日更加要回跌。其實「四叔」表現已經唔差,今日股價同財政預算案公布前都可以力保不失。但同行新世界(00017)就慘慘豬,尋日收市後公布嘅中期業績,來自持續經營業務收入按年跌25﹒1%,經營業務股東應佔溢利按年跌12﹒8%;暫時股價插近半成,股價低過財政預算公布前。 其他本地地產股今日股價同財政預算案公布前無大分別,亦即係話,「切咗辣椒」對刺激樓價嘅作用有限。又係嘅,香港樓價一直是世界主要城市中最難負擔嘅,之所以成為「世界之癲」,除咗經濟好之外,仲因為開放俾境外人士買賣,吸引好多內地富豪來買房。而家內地經濟低迷,富豪跨境炒賣意慾亦低咗,所以「切唔切辣椒」影響唔大。當然,炒賣只係托高樓價嘅其中一個因素,其他如經濟環境、利率、供應等亦重要。經濟若好,特區官員就唔使絞盡腦汁搞夜繽紛留住港人,又要諗計吸引內地遊客來港消費。利息又無乜機會喺上半年減,所以「切辣」對本地地產股作用唔大。 呢兩日炒作「切辣椒」嘅概念反而去咗美聯(01200)度。亦難怪嘅,「切辣」最大作用就係刺激成交,樓價升跌唔緊要,對地產中介來講,最緊要多人買賣。所以呢兩日美聯升到傻,股價由財政預算案公布前嘅0﹒65元升到尋日最高嘅1元,升幅超過一半,都咪話唔和味。不過,高追就要諗一諗,股價回到0﹒8附近先有吸引力。(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情