04/07/2024 16:22
《小傳日記》商湯發布新AI!可控式圖生片有幾咁新派?
《小傳日記》孖屐引頸以待嘅世界人工智能大會(WAIC)今日終於喺上海揭幕,事前已經有一堆AI概念股炒起,其中商湯(00020)噚日偷步勁升一成七之後,今日喺大會上就發布新產品Vimi,係一款可控式嘅人物影片生成大模型。 近期有碌開Reels都會碌到,多咗一種由靜態圖片AI生成嘅短片,於是近期就有好多人用呢款AI將一啲經典memes圖生成影片,廣大網友對於睇咗咁多年嘅靜態memes圖竟然變成識郁,都感覺非常新奇有趣,因為竟然睇到memes圖嘅後續故事,但因為無得控制AI生成啲乜,擺幅圖入去生成就好容易出到奇怪又好笑嘅後續出嚟。 而商湯Vimi其實都係圖生片嘅AI,不過最大唔同就係「可控」,呢點令到Vimi喺WAIC上面獲選為大會最高榮譽嘅「鎮館之寶」稱號。據商湯介紹,Vimi可以精準咁控制人物表情,更加可以控制半身姿勢動作變化,再AI生成出同人物相符嘅頭髮、服飾同背景,光影方面都可以流暢自然咁生成。據講Vimi比起同類產品有更高嘅穩定性,最多可以生成出一分鐘嘅短片,唔會因為短片變長而減低像真度。商湯提到Vimi已經可以準備開放畀大眾使用,尤其針對客群係內容創作者,可以用幾張相嚟生成風格多變嘅短片,又或者生成之後再用嚟剪輯作其他創作。 今次呢個發布好就好在並唔止於概念,而係可以馬上推出應用,商業化潛力有幾高好快就知曉。但如同前人美圖(01357)一樣,面向大眾嘅生成式AI好容易過氣,美圖當日推出過由真人相生成人像畫AI曾經掀起熱潮,但曇花一現到而家已經無乜人玩。點樣可以延長技術生命周期,同脫離「試玩」,都係好多AI公司要解決嘅難題,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票