《小傳日記》噚日講起江小白怒告東方甄選（０１７９７），事緣主播天權亂噏話江小白旗下白酒唔係固態蒸餾，即係加咗釀造酒精，並唔係純糧。而江小白就澄清話係名正言順嘅「純糧固態發酵」，早幾日正喺重慶狀告東方甄選。事件喺神州網上發酵得比白酒仲快，孖屐先開始正式留意江小白呢個白酒品牌。　　今次事件最重點就係「固態發酵」同「非固態發酵」嘅分別，其中「固態發酵」就係指係釀酒過程入面，微生物喺無加入水或者其他液體嘅發酵，酵素會多一啲，釀出嚟嘅成品會有比較多嘅風味。而另一點執著就係「純糧」同「非純糧」，江小白強調所有產品都係「純糧固態發酵」，無添加釀造酒精。　　雖然江小白對於被屈溝咗酒好唔忿氣，但發酵過程加釀造酒精都唔係完全係十惡不赦。以日本清酒為例，可以簡單分為純米酒系同本釀造酒系，就係有無添加釀造酒精嘅分別。雖然純米一定係功夫花多好多，但唔代表一定純米好過非純米，因為加釀造酒精嘅作用並唔係要揸流攤，而係想帶出酒體嘅唔同風味。打個比如光線係白色，要用三稜鏡先可以分開睇到七色彩光，釀造酒精就可以將濃厚嘅酒風味分返開，令人更容易飲到酒身嘅唔同味道。　　不過喺神州境內，白酒三大香型最王道嘅就係醬香型白酒，「純糧固態」係基本，再經反覆多次嘅蒸煮同發酵，再陳放幾年先可以出廠，所以出嚟風味最濃厚，香氣就好似發酵嘅黃豆醬一樣濃郁持久，亦都係目前最矜貴同熱炒嘅酒，所以江小白點解對於產品係咪純糧就咁執著，因為係直接反映產品同品牌嘅價值。　　雖然江小白產品都係純糧，但普遍都係屬於三大香型入面嘅清香型，釀造步驟比醬香型少一啲，價錢都無咁貴，所以江小白先至可以主打年青人市場。江小白５００毫升４０度銀蓋，喺京東除開每支都唔使７５銀港紙，就知真係後生都飲得起。有鑒神州消費降級，而且白酒整體售價今年以來係咁跌，尤其龍頭茅台價格都屢創新低，江小白呢類新晉酒牌索性轉賣成本開支少啲酒型，實則就係白酒市場嘅內捲，唔捲邊到發到圍。今次搞一搞，唔少關注事件嘅網友都一定會想開返支江小白睇吓有咩料到，所以江小白難得有機會點可以輕易放過東方甄選？請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

樂本健【年度感謝祭】維柏健及natural Factors全線2件7折► 了解詳情