《小傳日記》前腳講完東方甄選（０１７９７）太耐無出事，後腳就即刻出大事，果然喺招惹是非方面唔會令人失望；原來搬總部「自立門戶」只係前菜，董宇輝離職真正「自立門戶」先係真正嘅辣味主菜。　　噚晚六點東方甄選放出震撼彈，經過一場又一場風波之後，都係逃唔過台柱董宇輝最終離巢嘅命運。通告入面解釋：「該離任乃由於董宇輝的職業抱負、對其他事業的投入及個人時間安排」。同時東方甄選正式公告「與輝同行」將以大約７６５８萬人仔出售全部股權予董宇輝，換句話講係連人帶公司一次過剝離，乾乾淨淨。　　雖然話係「賣」畀董宇輝，但公告後俞敏洪即時上水回應，出咗篇《致東方甄選股東朋友的一封公開信》，入面提到為咗向董宇輝表示感謝，除咗已經支付承諾嘅全部待遇之外，仲會將與輝同行嘅全部淨利獎勵都畀董宇輝。俞老闆更加喺抖音評論區強調，董宇輝買與輝同行嘅錢「早已安排，公司是送給他的」。　　自上年「小作文」以來，東方甄選就一路是非纏身，差唔多次次都係董宇輝啲丈母娘為佢抱不平而引發嘅爭議，期間仲令前ＣＥＯ孫東旭慘成炮灰敗走。喺最新呢份公開信入面，俞敏洪都唔轉彎抹角，提到東方甄選身為互聯網企業，輿論力量經常都會影響到公司發展，都直接令東方甄選同與輝同行有所隔閡。為避免業務衝突和輿論糾葛，最後都係咁嘅決定。　　呢個消息震撼，但其實唔意外。之前都提過是是非非的而且確影響緊東方甄選個價，如今的確係可以令俞老闆可以過返啲好日子，唔使日日走出嚟道歉。不過俞老闆本人有好日子過，唔代表東方甄選有好日子過。大和就今次董宇輝散水一事出報告，提到與輝同行佔東方甄選所有直播頻道總ＧＭＶ嘅接近一半，預計董宇輝嘅離任將會為東方甄選下一年帶來１４％至１８％嘅負面影響，對盈利方面更加有２５％至４０％負面影響。大和認為，分手之後與輝同行由親生仔變成對手，未來仲會面對來自與輝同行嘅的競爭和輿論壓力，所以就將２０２５財年同２０２６財年嘅盈利預測大降５４％同５８％，評級直接由「持有」掟落「跑輸大市」，目標價由２９銀大劈六成去１１銀。　　與其話同董宇輝分手係「長痛不如短痛」，更貼切嘅講法應該係「痛定思痛」。既然留佢喺度會是非纏身影響股價，唔留喺度又會業績差咗影響股價，倒不如引刀成一快，摒棄繼續依賴董宇輝嘅經營模式，重新搵過新嘅賺錢引擎，先係一間企業合理嘅發展模式。雖然無可避免眼下係會賺少好多，但反而可以鞭策出一條新嘅路。俞敏洪經歷「教育雙減」都可以浴火重生，今次呢關唔通又會難得過上次？請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【香港好去處】etnet全新頻道盛大推出！全港最齊盛事活動資訊盡在掌握！► 即睇