《小傳日記》花旗國確診人數飆到２０萬，道指嚇到又跌近千點，亞洲呢邊孖屐點會好過，一早魚缸開波先跌二百幾點為敬！焦點梗係隻大象（００００５），米字國央媽插手話英資行唔畀派息，嚇到大家拿拿聲沽貨，今日一嘢低開之後低見３７﹒８銀，拖累恆指一度見２２７５６點跌３２９點；點知午後魚缸嚟個反高潮，跌幅度逐步收窄之餘仲嚟個Ｖ彈，原來係油佬領軍撐市，算係呢期好消息，最終恆指收報２３２８０點，升１９４點或近１巴仙，主板成交８９７﹒１６億銀，按日大跌三成一。國企指數報９５２６點，升１２１點或逾１巴仙。　　內地Ａ場今日都走勢唔錯，上證綜合指數報２７８０點，升４６點或近２巴仙；深證成分指數報１０１７９點，升２２７點或逾２巴仙。兩市合共成交５９７７﹒２９億人仔。　　大隻藍戰士今日都互有攻勢，生發發（００３８８）升近２巴仙，報２３５銀；ＱＱ（００７００）漲逾１巴仙，報３７９﹒８銀；建行（００９３９）漲跌唔夠半巴仙，報６﹒２２銀；中移動（００９４１）飆逾３巴仙，報５９﹒１銀；ＡＩＡ（０１２９９）微升唔夠半巴仙，報６９﹒８銀。

＊大象無人吼港資行風騷，齊齊沽磚頭恆隆未跌夠＊　　　　話說大象唔派息呢單嘢搞到滿城風雨，個個都要錢唔要貨，所以股價失守３９銀，收跌近３巴仙，報３８﹒９銀；另一英資行渣打集團（０２８８８）尾市跌幅收窄，最終無升跌，報３９﹒９銀。不過大家似乎都轉追港資行，恆生銀行（０００１１）升近３巴仙，報１３１銀；中銀香港（０２３８８）抽高逾２巴仙，報２２﹒２銀。東亞銀行（０００２３）就跪低近２巴仙，報１５﹒９４銀。　　疫情下百業蕭條，各行各業都唔知捱到幾耐，磚頭佬都唔重有無租收，今日都依然呈現捱沽狀態，恆隆地產（００１０１）挫逾２巴仙，報１５﹒３銀；領展（００８２３）潛逾２巴仙，報６４﹒５銀；太古地產（０１９７２）跌近２巴仙，報１９﹒９２銀；新地（０００１６）逆市升唔夠半巴仙，報１０２﹒７銀；信和置業（０００８３）微升近半巴仙，報９﹒６４銀。

＊神州增儲備石油佬獲利，補貼要被減汽車佬真慘＊

　　本日石油佬就同大家完美示範咩叫Ｖ型反彈。本來隔晚油價因為花旗國原油庫存激增急跌，本來諗住油佬應該繼續無運行，點知神州突然話要加快增加石油儲備，油價拗腰急彈，油佬都跟著倒升，仲領跑藍籌。中石油（００８５７）抽升近一成，報３﹒０６銀；中石化（００３８６）飛起近９巴仙，報４﹒０６銀；中海油（００８８３）升超７巴仙，報８﹒６３銀；中海油服（０２８８３）飆近一成二，報６﹒５８銀；昆侖能源（００１３５）彈高近７巴仙，報４﹒５８銀。　　不過汽車佬就無咁好彩啦，外電傳神州政府正考慮削減購買電動車一成補貼，仲要收窄補貼範圍，汽車佬齊齊下跌。華晨中國（０１１１４）同東風集團（００４８９）跌近２巴仙，分別報５﹒９８銀及４﹒６７銀；廣汽集團（０２２３８）跪低逾４巴仙，報６﹒６８銀；北京汽車（０１９５８）下滑超半巴仙，報２﹒９４銀；吉利汽車（００１７５）升不足半巴仙，報１０﹒８８銀。

＊大象唔派息公用佬得益，物管佬受寵股價續上湧＊

　　愚人節當日大象好似同缸友開左個玩笑咁，話今年唔派息就真唔派，搞到缸友對錢莊失去信心，啲資金走咗去公用佬度。香港電訊（０６８２３）飆近７巴仙，報１１﹒３８銀；中電控股（００００２）彈起超２巴仙，報７２銀；港鐵公司（０００６６）跳高１巴仙，報３９﹒９５銀；長江基建（０１０３８）揚不足半巴仙，報４０﹒４５銀；港燈（０２６３８）飆近３巴仙，報７﹒７５銀。　　新冠疫情未完，物管佬繼續成缸友嘅避震中心，當中，永升生活服務（０１９９５）早排獲中信證券睇好，全日漲近４巴仙，報９﹒６７銀；時代鄰里（０９９２８）飆近７巴仙，報６﹒４３銀；保利物業（０６０４９）升逾１巴仙，報６８﹒５銀；奧園健康（０３６６２）揚唔夠半巴仙，報６﹒２銀；雅生活服務（０３３１９）抽升超４巴仙，報３８﹒３５銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

【etnet 30周年】多重慶祝活動一浪接一浪，好禮連環賞！ ► 即睇詳情