《小傳日記》花旗國嘅三大指數雖然繼續破頂，但神州武漢肺炎疫情持續爆發，感染人數超過３﹒１萬人，死亡人數６３７人，仲要有專家預期疫情未必能嗻夏季受控；加上今日魚缸無好消息沖喜，已經連升４日嘅魚缸當然無力繼續上。大隻佬指數今朝（７日）低開１３７點，報２７３５６點，但無幾耐大隻藍戰士、「三桶油」同神州金融佬回吐，令大隻佬指數一度最多跌２６９點見２７２２４點。但臨近尾市，ＱＱ（００７００）再一次拯救大家，企穩４００銀，加上香江銀行出力，推出物業按揭貸款「還息不還本」等安排，拯救可能因經濟差而出現嘅「負資產」，香江磚頭最後都追返上來。令到本身跌接近２００點嘅大隻佬指數最終收報２７４０４點，跌８９點或跌近半個巴仙，主板成交９９４﹒０８億銀減少近兩成半。國企指數報１０７０５點，跌５９點或跌約半個巴仙。　　Ａ場方面，上證綜指報２８７５，升９點，幅度唔夠半個巴仙，深成指數報１０６１１，升１０點，兩市成交９２９５﹒８５億銀人仔。　　大隻藍戰士方面，大象（００００５）跌１亳子，報５７﹒８銀；ＱＱ（００７００）漲逾半個巴仙，報４０２﹒４銀；生發發（００３８８）跌近１個巴仙，報２７０﹒６元；ＡＩＡ（０１２９９）亦軟１個巴仙，報８０﹒２銀；神州移動（００９４１）升亳半子，報６７﹒３銀；建行（００９３９）微升一格，報６﹒３２銀。

＊俾業主唞唞銀號個別走，有錢還樓債磚頭升得快＊

　　香江經濟唔好，銀號驚人還唔到咁款。中銀香江（０２３８８）就話，推出５個金融服務支持措施，包括物業按揭貸款可以「還息不還本」同中小企抗疫專項貸款計劃等等。「小象」恆生（０００１１）跟機話，如果啲客有２３需要，都可以安排唔同類型產品嘅「還息不還本」，例如貿易貸款、商業貸款等。渣打（０２８８８）就話研究緊唔同紓困方案，幫啲出現經濟困難嘅客喎。今日銀號走勢個別發展，中銀踼高近１巴仙，報２６﹒７５銀；小象跳高逾１巴仙，報１６２﹒９銀；渣打唔見咗超過２個巴仙，報６４銀；大象無咗兩格，報５７﹒８銀；東亞（０００２３）輕跳逾半巴仙，報１７﹒４２銀。　　可以遲啲還錢，暫且解決咗可能出現嘅負資產問題，部分本地磚頭佬今日逆市走上，恆地（０００１２）輕跳近半巴仙，報３６﹒５５銀；新世界（０００１７）跳一格，報１０﹒１８銀；會德豐（０００２０）彈三格，報４８﹒３銀；新地（０００１６）、長實（０１１１３）同信置（０００８３）就平收，分別報１１３﹒５銀、５１﹒２５銀同１０﹒８銀。

＊醫藥兩邊遛誰笑到最後，全民宅在家軟件頂呱呱＊

　　連日畀冠狀病毒疫情炒起嘅醫藥佬，今日卻出現「向左走向右走」景象。其中，海王英特龍（０８３２９）就話佢附屬生產嘅注射液被納入試行第五版新冠病毒肺炎診療方案，股價好似坐火箭咁飆高１﹒４倍，報０﹒７２銀；康寧傑瑞（０９９６６）附屬通過歐盟品質現場檢查，彈起４巴仙，報１４﹒８６銀；但係累計急升幾倍嘅中國醫療集團（０８２２５）就回吐一成一，報１﹒２６銀；石四藥集團（０２００５）跌近２巴仙，報７﹒２８銀；歌禮製藥（０１６７２）腳軟不足半巴仙，報４﹒３９銀。　　新型肺炎仍在蔓延，全民宅在家仍然係大勢所趨，軟件佬繼續被炒起。網龍（００７７７）急飆一成六報２７﹒６５銀；美圖公司（０１３５７）剷高１７巴仙，報１﹒８５銀；金山軟件（０３８８８）大漲一成，報２９銀；金蝶國際（００２６８）升近９巴仙，報１０﹒５銀；中軟國際（００３５４）彈７巴仙，報５﹒５６銀。

＊中央要降價保險佬怕怕，炒風又再起５Ｇ好歡喜＊

　　新型肺炎疫情仍未見紓緩，正當保險佬為訂單增加興起，神州銀保監就突然發布《普通型人身保險精算規定》，話應現時民眾對保險嘅需求，調整咗健康保險、意外傷害保險等的最低現金價值參數，搞到風險保障類產品價格進一步下降，要畀消費者切實得到實惠喎。保險佬趴低一片，人保（０１３３９）跌近２巴仙，報２﹒９２銀；太平（００９６６）同新保（０１３３６）下滑２巴仙，分別報１７﹒２２銀及３０﹒６５銀；財險（０２３２８）走低近１巴仙，報８﹒７銀；平保（０２３１８）軟半巴仙，報９１﹒５銀。　　除咗上面講嘅軟件佬係近期缸友嘅寵兒，５Ｇ佬都唔輸蝕，都急急跑嚟湊熱鬧。京信通信（０２３４２）升超過６巴仙，報３﹒１９元；長飛光纖光纜（０６８６９）漲５巴仙，報１５﹒６８銀；神州通信服務（００５５２）揚１巴仙，報５﹒７１銀；中興通訊（００７６３）同神州鐵塔（００７８８）企穩，分別報２７﹒９銀及１﹒８１銀。周末愉快，請請！

　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

【你點睇】本港主要銀行跟隨美聯儲減息，你對樓市前景有否信心？► 立即投票