《小傳日記》香江魚缸噚日（３日）被淡友猛烈進攻，一度插近千點兼穿過二萬八關，元氣已經大傷。就算花旗國魚缸隔晚假期半日市，收升返百幾點，都完全幫唔到香江打氣，今朝（４日）象徵式向上衝一衝都唔夠１００點，就調頭碌返落嚟最多挫約４００點至２８１４１，驚。　　其實，心水清嘅缸友，只要望住股王ＱＱ（００７００）、平保（０２３１８）同建行（００９３９）三大重磅佬嘅表現，齊齊唔見１至２巴仙，分別收３８３銀、６９﹒８５銀及７﹒０５銀，就可以估到魚缸根本就無力反擊。　　　　　就連祖國６月財新服務業ＰＭＩ升至５３﹒９創四個月高，Ａ場都收低１巴仙報２７５９。香江又點會唔繼續向下碌呢…。總結全日，香江魚缸收市唔見３０３點報２８２４１。國指都走低１５９點或１﹒５巴仙收１０７１２。魚缸走勢咁差，缸友唔敢出手，全日成交大減３３巴仙只得８９１億銀左右。

＊傳戰略剎停碧桂園否認，水泥佬捱沽潤泥大叫苦＊

　　呢排魚缸頻頻地震，祖國內房佬災情相對比較嚴重，除咗驚孖屐水緊影響周轉，同埋阿爺出招降溫之外，深圳上個月新建商品住宅成交均價，已經連續錄得２１個月下跌，缸友都紛紛掟貨。碧桂園（０２００７）仲傳出壞消息，就算公司已經否認叫停三四五城市全覆蓋戰略，都穩定唔到軍心，收市要急插近６巴仙報１２﹒７２銀，係第二差藍戰。另外，兩位藍戰街坊，中海外（００６８８）同潤地（０１１０９）都跟市唔見近２巴仙，分別報２４﹒９５銀及２５﹒１０銀。至於用近３億銀回購嘅中國恆大（０３３３３）就好古怪，本來尾市都仲瞓低緊逾７巴仙，但收市前突然抽返高，最後平手完場報２０﹒７５銀，要小心了。　　水泥佬同內房佬關係密不可分，潤泥（０１３１３）都受累跟住一齊向下碌，大跌逾６巴仙收７﹒０５銀，百天線（約７﹒３５４銀）被攻陷埋。大阿哥海螺水泥（００９１４）都無運行，收低近４巴仙報４１﹒６５銀。

＊藥佬頭暈暈石藥腳震震，晶片佬散水華虹無人追＊

　　醫藥佬都開始病到頭暈暈，頂唔住魚缸咁弱，呢排相對唔係跌好多嘅石藥（０１０９３）都藥石無靈，今日被交銀國際繼續唱淡，維持中性評級，目標價２２銀不變，搞到股價急插逾８巴仙收２１﹒２５，即刻跌穿埋交銀目標價，表現更差絕藍戰。街坊神威藥業（０２８７７）都非常失威，收市蒸發近９巴仙收１３﹒８４銀，百天線（約１４﹒０５銀）亦要說再見。　　另一邊廂，喺上個月成為缸友寵兒嘅晶片佬，都齊齊回吐返賺到嘅升幅，華虹（０１３４７）喺「六絕月」無懼跌市，屢次逆市創新高，上星期三（２７日）喺３０﹒６銀山頂位插旗後，呢幾日都高處不勝寒，今日再碌低逾７巴仙收２４﹒７銀，收低十天線（約２６﹒４５銀）兼下試廿天線（約２３﹒８３銀），未走嘅缸友都要小心了。街坊中芯（００９８１）都差唔多命運，埋單唔見近５巴仙收９﹒７銀。

＊兩電傾電價唔減反而加，電能勢轉旺長建也不錯＊

　　行政會議通過中電（００００２）同港燈（０２６３８）新《發展計劃協議》，兩電准許回報率由９﹒９９巴仙降至８巴仙，然後元旦起，港燈將加價６﹒８巴仙，中電１０月起亦加電費２巴仙，唔單止咁！未來五年電費仲預計會年年加添！家吓香江生活乜都加，有無諗過買返兩電收吓息對沖下電費？有唔少缸友似乎早有呢個主意，今日踢起中電近４巴仙，報８７﹒６銀，盤中去到８９﹒４銀破頂，威盡藍戰，港燈亦飛起逾４巴仙，報７﹒８３銀，今日高見７﹒９２銀創新高！　　喺超人系當中，今日逆市上揚嘅唔止港燈，仲有獲瑞信升他屐至８４﹒３銀嘅長建（０１０３８），股價跳起近３巴仙，報５９﹒９５銀。同系電能（００００６）形勢亦似乎轉旺，有近２巴仙落袋，報５６﹒２銀。

＊中興獲開恩高飛得一陣，瑞聲腳軟軟跌勢仲未斷＊

　　貿易戰下慘成炮灰嘅中興（００７６３）有傳獲得花旗國皇恩浩蕩，准許恢復部分商業活動，與此同時仲考慮終止對公司嘅七年禁令。咁好嘅消息令中興一開市就跳起近５巴仙，不過缸友隨即冷靜下來，中興話咁快又調頭向下行，收市倒跌返逾３巴仙，報１２﹒３８銀。　　同中興有業務來往嘅舜宇（０２３８２）就唔見逾４巴仙，報１３８銀，股價受制於十天線；早前被里昂劈他屐到１２０銀，但評級重申「跑贏大市」嘅瑞聲（０２０１８）唔見近４巴仙，報１０３﹒９銀。請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

樂本健【秋日開倉26 - 27/9】保健品低至$20！► 火速行動