《魚缸博客》今晚（１４日凌晨）聯儲局公布議息結果，相信會維持聯邦基金利率目標範圍喺５﹒２５至５﹒５厘，但最緊要係睇吓當局同時發布嘅經濟預測，對未來嘅經濟、就業同通脹發展持咩觀點，雖然聯儲局都已經明示出年會減息，但最終減幾多就唔確定。　　美國勞工部尋晚公布最新ＣＰＩ，整體按年升幅由１０月份嘅３﹒２％放緩到１１月嘅３﹒１％，但聯儲局作為通脹指標嘅核心ＣＰＩ，按年就維持上升４％。不過，一個月嘅數據改變唔到市場對出年減息嘅預期，美股三大指數繼續上升。當然，港股又係另一個故事啦！　　恒指開市跌６２點或０﹒４％，報１６３１１，萬六點依然未穩，但又唔係完全冇反彈機會，依圖而論，尋日恒指就出現咗個上升訊號，只係唔知有效期幾耐咁解。如果係全ＡＩ操作，尋日或者今朝就已經入咗市揸恒指喇，止蝕位當然要擺，穿１５９７２就要ｃｕｔ　ｌｏｓｔ。　　今日都係講番隻藥業股，就係中生製藥（０１１７７）。消息方面，集團話佢研發嘅創新藥ＴＱＨ２７２２，Ｉ期臨床研究結果顯示ＴＱＨ２７２２無嚴重不良事件及導致停藥嘅不良事件發生，不良事件以注射部位反應與各類檢查異常為主，且大部分自行消退。此外，ＴＱＨ２７２２表現出非線性靶點介導嘅藥代動力學特徵，半衰期約為４至１８天。ＴＱＨ２７２２喺特應性皮炎受試者中進行嘅２期研究已完成所有受試者入組，計劃明年公布研究結果。同時，針對慢性鼻竇炎適應症嘅２期研究已同步開展。　　炒股當然要睇股價表現。從日線圖睇，中生製藥由今年１０月２４日最低２﹒５９銀，升到１１月高位３﹒８９銀，１２月開始調整，星期一最低見過３﹒２銀。計一計數，如果調整１０至１１月升幅五成，股價就跌到３﹒２４銀，即使調整升幅五成基本達標，再望埋移動平均線，過去兩日，股價都穿過條５０天線（現約３﹒２７），但都可以守穩收市，而且高位逐步上移，所以短線值博，以收低過３﹒２銀止蝕，現價３﹒３５買入，初步目標３﹒６銀，企穩就上望３﹒９銀先，之後再根據市況發展作部署！　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】本港主要銀行跟隨美聯儲減息，你對樓市前景有否信心？► 立即投票