今個星期魚缸真係夠曬反覆，上個星期魚缸先喺三萬關上上落落，今個星期侵侵一句說話反枱就令到魚缸連日急跌，噚日就已經跌到同２５０天牛熊分界線（約２８００７）只差３００幾點。今日魚缸雖然早段都反彈到５２２點，但嚟到近１２點花旗國加徵關稅嘅期限，魚缸升幅就曾經一步步收窄到只有唔夠１００點，睇嚟今日都係凍過水？
　　今次魚缸大跌，無疑同侵侵突然話要上調關稅有關，同時佢亦話神州呢邊，想等到前副總統拜登有望上任之後，先再重啟談判。缸友們聽到呢到可能會覺得唔通貿易戰可以喺民主黨上場之後得到緩解？但博客諗法就唔太樂觀，因為其實民主黨對神州嘅態度可能比侵侵仲強硬！上個月侵侵曾經揚言對歐盟加關稅嘅時候，眾議院議長佩洛西（Ｎａｎｃｙ　Ｐｅｌｏｓｉ）就講過，花旗國錯失咗聯手歐盟向神州施壓嘅機會，所以話花旗國對神州態度「轉鷹」應該唔係短期可以改變到。
　　適逢嚟到「五窮月」，今年睇嚟應該又要應驗喇，而下個「六絕月」睇嚟魚缸走勢都唔太樂觀，現時好多魚毛都已經跌到一仆一碌，缸友可能心郁郁想買，不過跌市勿摸底！咁有無跌市反而會逆市漲嘅魚毛呢？
　　博客就睇到一類魚毛喺跌市表現反而硬淨，佢地就係逆向ＥＴＦ啦！所謂逆向ＥＴＦ即係睇淡嘅ＥＴＦ，透過運用股指期貨、互換合約等嘅槓桿投資工具，實現每日追蹤目標指數收益嘅反向一定倍數嘅交易型開放式指數基金，即時跌市就有錢賺！比對其他衍生工具，呢類逆向ＥＴＦ嘅入場費好低，以其中交易比較多嘅ＦＩ南方恒指（０７３００）同ＦＩ南方國指（０７３８８）為例，一手只係５００銀多少少，而且不設時間值，風險相對較低，缸友可以視乎自己可以承擔幾多風險，選擇投放幾多注碼。
　　睇返ＦＩ南方恒指嘅公仔圖，喺上個月２３日就有大成交配合，近日升幅更愈升愈有，求保險但又想有錢賺嘅缸友不妨現價先入第一注，等魚缸再跌就再買。當然，缸友都要繼續留意貿易戰嘅發展啦！
　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【etnet 30周年】多重慶祝活動一浪接一浪，好禮連環賞！ ► 即睇詳情