真明麗（０１８６８）公布有「開心大發明」，話研發到減低生產ＬＥＤ成本嘅方法，而家仲申請埋專利添，即時為股價沖喜，今日（２９日）曾試過炒高近１倍！
　　雖然今日炒到真明麗「火辣辣」，但博客相信仲未聞到燶味，皆因自佢跌穿１蚊後，好有韌力咁守到而家都無「破底」，故仍炙可以一博。相反，今日坐順風車炒高嘅達進東方照明
（００５１５）就有啲危啦，行家搵到新發明、拎專利，有云「同行如敵國」，就如對家副牌抽到成副萬子，摸親牌都入章，想唔食清一色都難啦！所以今日追跟東方照明嘅缸友小心會「出銃」。
　　睇番真明麗，今日一支火箭咁「升天」，一口氣修補番３月時個下跌裂口；雖然上年成績嚇親人，盈轉虧蝕成１４億人仔，但事隔咁耐，喺街嘅蟹貨都應該消化得七七八八。若今日魚缸「收工」時都仲保到呢個心理關口，中、短線都可以揸多陣玩玩。

　　《編者按》本欄搜羅即市傳聞，惟消息未經証實，《經濟通》亦不保證內容之準確性。

【你點睇】本港主要銀行跟隨美聯儲減息，你對樓市前景有否信心？► 立即投票