國慶前阿爺都想大家開開心心過節，金融三招出台唔夠一個星期，就喺上海加推更加貼近民生嘅5億人仔消費券，再喺政治局會議大吹暖風，孖屐氣溫暴升，喺期結日前挾升最多800點，仲差啲逼穿20000，國慶前認真發過豬頭。而對香港方面，兩隻大熊貓就算係今年嘅國慶大禮之一。
　　大熊貓來港嘅大新聞，前前後後炒足大半年，鑊氣勁過港股！今年2月初已經開始有政界人士提起可能會再有大熊貓來港，後來7月初特首李家超率團到四川都江堰基地視察，最終敲定喺國慶前將兩隻大熊貓送嚟香港。考察團回港之後，文體旅局局長楊潤雄就話「唔係淨係要佢哋生兒育女」，會以大熊貓作為生招牌嚟推動「熊貓經濟」。
　　熊貓經濟並唔係無本生利，神州方面都要求有返咁上吓配套先容許「借出」大熊貓。據2018年馬來西亞租借一對大熊貓，當地媒體就統計咗一次養熊貓嘅使費。首先當然要建造一個合適嘅環境，當年大馬就使咗2300萬至4000萬港紙，中間數大約係3000萬銀。唔計一次性支出，每對大熊貓每年仲要向神州支付100萬美金租金，即係大約780萬港紙，然後要再支付「支持大熊貓研究費用」，一年大約475萬銀，每年合共向神州畀大約1255萬銀。
　　另外，大熊貓要食竹，粗略估計每年食大約70萬銀；而且照顧大熊貓要人，當時以美國動物園為例，種竹農場加上醫療人員，以及日常開支，總數大約係390萬銀。以呢條數嚟計，養大熊貓每年開支最少1715萬銀。
　　今日來港嘅安安、可可係中央政府「送贈」，應該可以免咗每年100萬美金嘅租金，但其他開支都應該要照畀。
　　港府並無實質講明要點樣推動「熊貓經濟」，但將動物熱度變現，就不得不提吓泰國嗰隻「彈跳豬」。「彈跳豬」其實係侏儒河馬，7月出世之後，由於個性比較活潑，泰國芭堤雅綠山國家動物園將佢啲日常表情相擺上Facebook，即刻做咗網紅河馬，成為通傳世界嘅meme。彈跳豬最出就係碌大眼擘大口嘅扮惡表情包，唔少人睇完meme圖之後都好想去親自見吓佢。單計今個月1號至19號，就有超過8萬人去動物園探彈跳豬，頭三個星期，動物園收入就已經超過286萬港紙。近期動物園仲玩埋直播，喺網上開設24小時直播，直播第一日就吸引到全球4.4萬名fans收睇。
　　睇返海洋公園方面，都唔係捉唔到路。近期海洋公園喺IG開account，專門po所有有關大熊貓嘅相，盈盈所生雙胞胎姊弟嘅相都係喺度公布，都有唔少follower㗎。不過呢，唔少國家嘅動物園其實都有大熊貓，大家嘅可愛程度都不相伯仲，喺「同行」競爭之下，安安、可可要好似當年高麗國福寶咁紅都唔容易，正所謂「有意栽花花不開」，網絡流量都係隨緣罷啦，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。7

【你點睇】本港主要銀行跟隨美聯儲減息，你對樓市前景有否信心？► 立即投票