【奇怪癖好】老闆眼中看出「垃圾美」！專執「垃圾」放滿辦公室

　　上司、老闆，喺唔少小薯打工仔心目中，都係尊貴一族，神聖而高貴，同我哋呢啲打工凡人絕非同一階層。但我慢慢發現，上司及老闆，都有一種奇怪嗜好，就係鍾意摷垃圾、執垃圾，然後據為己有。點解一個有學識（掛），有家底嘅人，會鍾意執垃圾？仲要唔係一個半個老闆有呢種喜好，我相信全港8成老闆都有呢個奇怪習慣！

執垃圾唔係問題，但世界上會執垃圾嘅老闆，有兩種︰

　　第一種，廢物再造。一個老闆，如果可以將執返嚟嘅廢物再包裝，令佢變成一件有用嘅野，而唔再係垃圾，咁呢個老闆係一個絕頂好老闆；情況就好似十幾年前嘅電影《玻璃樽》一樣，戲中成龍專做回收廢物嘅買賣，令到冇用嘅野變得有用及值錢，甚至令人人都搶住想要。如果各位跟到呢個咁環保而又有腦嘅上司，應該好好跟佢學習。

　　第二種老闆，就係執完件垃圾擺係度等佢變黃金。垃圾特點係咩？冇用、污槽、臭、一文不值。而當個老闆將一件垃圾執咗返嚟，冇好好改造佢令佢變成有用嘅嘢，反而日日望夫石咁望佢成金；而垃圾亦因為一直被睇高一線，以為自己與別不同，不思進取。最終，垃圾依舊係垃圾，仲因為腐爛而滲水、發臭，細菌蔓延至老闆房或其他「真‧寶物」身上，令到其他寶物都開始腐爛變壞，全軍覆沒。

　　我諗講到呢度，大家都應該get到我想講乜。冇錯，「垃圾」即係「垃圾」，「真‧寶物」即係各位有實力卻被埋沒左嘅同事。有時我真係諗極都諗唔通，點解老闆們會對於某公司訓練出嚟嘅candidate特別情有獨鍾。你話「未試過，要請一個嚟搏一搏」。好！咁你試啦，試完知道係龍係鳳定係垃圾，起碼叫做有個經驗。但失敗嘅經驗唔足以令老闆清醒，佢依然係請啲出自同一間公司，執啲被裁員、被炒嘅人士進駐我哋公司？當你一而再，再而三咁請啲垃圾返嚟，用啲垃圾管治方法去head住我哋。業績，睇唔到有好轉；反而同事對公司嘅歸屬感就節節退減。梗係啦，眼前做到嘢嘅你唔升，咁多錢請個新同事返嚟，為大家製造麻煩，仲要我哋幫佢執手尾，邊個仲會對間公司有歸屬感呢？所以大家，以後見到會執垃圾嘅老闆不妨睇吓究竟佢係第一種定係第二種。如果咁好俾你遇到第一種，記得打風都要掹住佢；但如果遇到第二種老闆，真係俾一次機會佢都嫌多，搵定工跳槽啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情