復活節係紀念耶穌由死復生，為全人類帶來永生盼望嘅假期。點知今個復活節，卻將港獨議題復活，而今次將議題炒起嘅係港大法律學者、佔中發起人之一嘅戴耀廷。

　　戴耀廷喺上月「24日」去到台灣出席一個論壇時，指中國結束專制後，包括香港在內地嘅各地族群可考慮獨立成國或成立邦聯。喺發表言論第二日，即係25日，親中媒體大肆報道戴鼓吹港獨。跟手港府喺3月30日、中聯辦同港澳辦喺31日亦相繼發聲明譴責戴。

　　全線「反獨」又點能夠少咗建制派議員一份？喺4月1日，建制派發出一份聯署聲明譴責呢位佔中搞手；即係喺戴發表言論之後足足一個星期，建制派先如夢初醒，要齊齊將播獨「昇華」。

　　有政界口痕友就話，今次建制派反應之慢真係出人意表。大家要想像，一份咁嘅聲明，要由政府機關發出，並唔係一件容易嘅事，要層層上報，改完又改先出得街，唔同建制派無乜包袱，亂鬧一餐表個態已經得，好明顯建制派喺維護一國呢件事上面係有失責之嫌。聽聞幾位建制派大佬，喺中聯辦同港澳辦發出聲明之後先如夢初醒，急急腳補飛出聲明譴責，已經喺西環面前失晒分數。

　　失分咁要點？個別建制派議員當然就七情上面，繼續向戴發炮，其中有一位就非常搞鬼，同傳媒講「戴耀廷喺台灣言論係要聯繫海外反動勢力，目標係要反對專制，而反對專制，就係反對中國」。嘩！呢位建制派係真推波定假助瀾呀？反對專制就係反對中國！？真係唔知好嬲定好笑。

　　再講返戴耀廷，今次佢嘅言論，對非建制派嚟講，絕對係一場大災難。佢言論一出，香港反獨聲音此起彼落，一班非建制派為咗議席，亦唔敢撐戴撐得太盡，呢輪就更加係要謹言慎行，如果唔係到2020年隨時畀人DQ參選資格。Tina唔知戴心入面點諗，但如果我係非建制派的話，肯定心入面會同戴講：「出少句聲當幫忙啦！」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好