「我想向各位市民宣布，我唔會…我不會參加下一屆行政長官選舉。」CY呢一句說話，今日下午3點半唔單止震撼成個政界，更幾乎令香港出現輕微地震。

　　根據CY嘅講法，佢係為免未來數月的選舉工程，令家人承受不能承受嘅壓力，以及要盡父親同丈夫責任，照顧家庭，保護家人，所以宣布不爭取連任。

　　一個堂而皇之、又理所當然嘅解釋，唔少政界中人都即刻話，比起董生當日「腳痛」下台更加有說服力。但稍微有政治智慧嘅人都明白，「照顧家人」只係排球術語入面嘅「前掩」，實情肯定係阿爺落柯打，要權力欲爆燈嘅CY唔好再選。

　　其實從CY近幾個月嘅行徑，就已經知道佢嘅戰鬥格已經成型，由梁游被覆核DQ以來，到剛剛周二（6日）寸爆財爺唔答問題嘅回應，以及近幾日一本簿、一支筆頻頻落區，你話佢咁嘅款係想唔選全心照顧家人？！而佢唔選對政壇嘅震撼程度的確係驚人，事前絕無半點風聲，所以好肯定CY無可能單純為家人下呢個決定。

　　Tina問過幾位高人，佢地都係宣布前一個鐘左右先得知事件，事後從多方面分析都認為，係阿爺閘停。睇返今次CY選擇喺選舉委員會周日（11日）選之前做公布，好明顯係阿爺要求佢咁做，目的係唔想選委選舉有變數。如果佢真係為家人，早一個月就應該公布，又或者選舉委員會選完後公布都得，偏偏選前兩日講出嚟，政治目的非常明顯。

　　阿爺最主要嘅考慮，係各人打住ABC（Anyone but CY）去選選委，如果最後真係ABC派大勝，阿爺失威事小，多建制派候選人落場齊心同CY互相廝殺，都係非常唔好睇。阿爺滿意CY一心一意為阿爺辦事，呢方面無得爭論；但撕裂社會亦係事實，阿爺難以估計CY做多五年會搞成點，特別係港獨方面議題，顧全大局，阿爺亦要犧牲CY呢隻重要棋子。

　　CY唔選，最後選情會點？除咗葉劉下星期會公布參選之外，Tina聽聞亦會有「政府官員」下周宣布辭任官職。之前誓神劈願話唔會選嘅林鄭，政壇中人都話唔可以抹殺佢出選嘅可能。不過唔少人都認為，無咗CY嘅選舉，更加精彩！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票