2015-04-08

李錦聯大戰安德尊PartⅡ 網民狂寸做大龍鳳再呃Like

　　繼二月煮龍蝦煮出火，李錦聯與安德尊（大王）在無線節目《都市閒情》合作再度熱爆網絡。獲封「無敵鴛鴦鏟」的大王前日再到李師傅主場的「今晚食乜餸」環節做拍檔，上次霸氣十足的大王，今次卻被寸到開花，二人更見肢體碰撞，網友爭相分享「李安大戰」的片段。有口痕友狂推二人互窒有睇頭，應該開劇救收視，有輿論則認為只是搞大龍鳳呃Like，大家又覺得他們係咪假戲真做？

李師傅不留情面寸到盡，大王惟有出手還擊。

綽號「無敵鴛鴦鏟」的大王撞到李錦聯整個人彈開。

大王食肉丸骾親，李師傅有意無意拍拍大王背脊幫他「落格」。

　　兩個月前，李錦聯與大王在《都巿閒情》的環節「今晚食乜餸」擦出火花，煮龍蝦互窒火氣十足，片段炒出近40萬點擊率。二人其後多次接受訪問及成為雜誌封面，瞬間紅爆網絡。直至前日下午，二人再於同一環節碰頭，合力炮製「雙冬紅燒肉丸子」。上次威到盡的大王，今次卻忍口做下靶，反觀李師傅句句有骨贏氣勢，二人更有意無意出現「肢體碰撞」，最終李錦聯亦完勝大王。

李錦聯自誇：煮餸食硬佢

　　節目片段於當日下午開始在網上瘋傳，網友高呼這是現代版《乜太與你》，獻計TVB應開劇或節目予二人演出，必定好睇過《真情》。另一方面，有口痕友卻認為雙方只是交戲炒話題。攞晒彩的李錦聯昨晚接受本報記者訪問，強調與大王沒有刻意夾定：「我和大王平日都係咁，佢平時咁鍾意認叻，講嘢唔收口，做其他事就佢主導，但煮餸是我專業，可以食硬佢！」李師傅亦承認二人合作有火花，不少人更以為他們勢成水火，實情相識多年只是搞氣氛。他說：「我們綵排時唔係咁，對白都是臨場構思如何lead住佢，今次都幾成功！」

安德尊暗寸：拍檔威水

　　問及可希望多些與大王「拍住上」主持節目，他認為此舉只會有反效果。李師傅說：「我哋唔會求收視，亦唔係為搵錢，如果做多啲開12集就好難有火花，久唔久做一次大家開心。（個個星期做會點？）咁就死，無咁多料，做得太多無效果！」

　　至於安德尊則透過短訊回應，謙稱李師傅在節目中只是指導他。提到對方指「寸到盡」是要減其氣燄，大王即回應：「好一個李師傅！威水！」